Ümumdünya Səhiyyə Təşkilatı (ÜST) İndoneziyada iqlim dəyişikliyinə davamlı və ekoloji cəhətdən dayanıqlı səhiyyə müəssisələrinin qurulması ilə bağlı yeni hesabat dərc edib.

Azmedinfo.az ÜST-nin məlumatına istinadən yazır ki, hesabatda İndoneziya Səhiyyə Nazirliyinin ÜST-nin dəstəyi ilə xəstəxanaların iqlim risklərinə qarşı zəif tərəflərini müəyyən etmək üçün xüsusi qiymətləndirmə alətləri tətbiq etməyə başladığı bildirilib. Bu təşəbbüs ölkənin 2025–2030-cu illər üzrə İqlim Dəyişikliyinə Uyğunlaşma Milli Fəaliyyət Planının tərkib hissəsidir. Layihənin əsas məqsədi ekstremal hava şəraitində belə tibbi xidmətlərin fasiləsizliyini təmin etmək və səhiyyə sektorunun karbon emissiyasını minimuma endirməkdir.

Qeyd olunan strategiya çərçivəsində tibb müəssisələrində bərpa olunan enerji mənbələrindən istifadə, su təchizatı sistemlərinin təkmilləşdirilməsi və tullantıların idarə olunmasında dairəvi iqtisadiyyat prinsiplərinin tətbiqi nəzərdə tutulur. Proqramın genişləndirilməsi üçün SIKELIM adlı rəqəmsal monitorinq platformasından istifadə edilərək ölkə boyu xəstəxanaların "yaşıl" keçid prosesi izləniləcək.