Azərbaycanın elmi mühitində gənc istedadların öz bacarıqlarını nümayiş etdirdiyi ən nüfuzlu yarışlardan biri – "Sabahın Alimləri" müsabiqəsində Sabirabad rayonu 5 saylı tam orta məktəbin X sinif şagirdləri mühüm nailiyyət əldə ediblər. Gələcəyin iddialı həkimləri, onların fədakar biologiya müəllimi və layihənin ideya müəllifi olan biologiya üzrə fəlsəfə doktoru, dosent Zenfira Qədimovanın birgə zəhməti nəticəsində komanda III yer və bürünc medal qazandı!

Azmedinfo.az xəbər verir ki, ideya müəllifinin də bildirdiyi kimi bu uğurun arxasında halal zəhmət, istedad, əziyyət, əzm, güclü iradə və prinsipiallıq dayanır. Final mərhələsinə yüksəlmək heç də asan olmayıb. Ümumilikdə müsabiqəyə 654 layihə təqdim edilib, onlardan yalnız 138-i finala keçib. Şagirdlərin iştirak etdiyi "Tibb və Sağlamlıq" bölməsində 67 layihə mübarizə aparıb və yalnız 12-si I, II, III yerlər uğrunda yarışıb.

Gənc alimlərin təqdim etdiyi "Milli Genofondumuz: Uzunömürlülər" adlı tədqiqat ölkəmiz üçün unikal mövzuya həsr edilib. 20 ildən artıqdır ki, bu istiqamətdə çalışan Zenfira Qədimova uzunömürlülük fenomenini araşdıraraq, bu dəfə araşdırmanı məhz Aran regionuna yönəldib. Bu tədqiqat Azərbaycanın təkcə təbii sərvətləri ilə deyil, eyni zamanda milli və mənəvi sərvətləri ilə də zəngin olduğunu bir daha sübut edir. Uzunömürlülüyü ilə seçilən vətənimiz – dağları, düzənlikləri, yaylaqları və aran torpaqları ilə daha əziz, daha dəyərlidir!

Bu möhtəşəm uğur, heç şübhəsiz, gələcəyin alimlərinə yeni stimul verəcək. Elm yolunda inamla addımlayan Sabirabad məktəbliləri göstərdi ki, zəhmət, əzmkarlıq və elm sevgisi sayəsində böyük zirvələr fəth etmək mümkündür. Gələcəyin həkimləri və alimləri üçün bu, yalnız bir başlanğıcdır!