Birləşmiş Millətlər Təşkilatının nay ayının 12-də başlayan 8-ci Qlobal Yol Hərəkəti Təhlükəsizliyi Həftəsi piyadaların və velosipedçilərin təhlükəsizliyinin təmin edilməsinə həsr olunub.

Azmedinfo.az xəbər verir ki, bu münasibətlə Ümumdünya Səhiyyə Təşkilatı (ÜST) "Piyada gəzinti və velosiped idman növünün təşviqi: siyasət seçimlərinin alətlər dəsti" adlı yeni metodik bələdçini təqdim edib.

Yol-nəqliyyat hadisələri dünya miqyasında ölüm və əlilliyin aparıcı səbəblərindəndir. ÜST-ün təqdim etdiyi statistik rəqəmlərə görə, hər il demək olar ki, 1,2 milyon insan yollarda həyatını itirir. Onların dörddə birindən çoxu piyadalar və ya velosipedçilərdir.Bununla belə, dünya üzrə yolların yalnız 0,2%-i velosiped zolaqları ilə təchiz olunub.

"Piyada gəzinti və velosiped idmanı insan sağlamlığını gücləndirməklə yanaşı, şəhərlərə dayanıqlı yaşıl səhiyyə qazandırmaq iqtidarındadır. Hər bir addım və hər bir velosiped sürmə tıxacları, havanın çirklənməsini və xəstəlikləri azaltmağa kömək edir" - deyə, ÜST-ün baş direktoru Tedros Adanom Qebreisus diqqətə çatdırıb. Onun sözlərinə görə, daha çox insanın bu daha sağlam və ekoloji cəhətdən təmiz nəqliyyat növlərini seçməsi üçün piyadaların və velosipedçilərin təhlükəsizliyini təmin etmək vacibdir.

Gəzintinin və velosiped idmanının çoxsaylı üstünlüklərinə baxmayaraq, dünya ölkələrinin üçdə birindən azı onları təşviq edən milli strategiyaya malikdir. ÜST-ün təqdim etdiyi yeni bələdçi bu boşluğu doldurmaq və siyasətçilərə, şəhər planlaşdırıcılarına, səhiyyə fəallarına və vətəndaş cəmiyyətinə praktiki, sübuta əsaslanan məsləhətlər vermək məqsədi daşıyır.

Metodik bələdçi bir sıra qətiyyətli addımların atılmasını tövsiyə edir. Bunlardan başlıcası piyada gəzinti və velosiped idmanı növlərinin hökumətlərin milli nəqliyyat, sağlamlıq, ətraf mühit, yaşıl səhiyyə, habelə təhsil strategiyalarına inteqrasiya olunmasını təmin etməkdir.

ÜST mayın 18-dək davam edəcək 8-ci Qlobal Yol Hərəkəti Təhlükəsizliyi Həftəsi çərçivəsində dünya üzrə yüzlərlə təşkilat və hökuməti yol təhlükəsizliyini yaxşılaşdırmaq üçün təcili tədbirlər görməyə çağırır.Yol Təhlükəsizliyi üzrə Qlobal QHT Alyansı dünyanın 100 ölkəsində 400-dən çox üzv təşkilatı bu kampaniyaya dəstək vermək üçün səfərbər edib.