Azmedinfo.az xəbər verir ki, haymorit zamanı xəstə xüsusilə burun və yanaq sümükləri ətrafında təzyiq və ya ağrı hiss edə bilər. Ağrılar bəzən gözlərin ətrafına, alın nahiyəsinə və hətta yuxarı çənə dişlərinə qədər yayıla bilər. Xəstələr tez-tez qalın, sarı və ya yaşıl rəngdə burun axıntısından şikayətlənirlər. Bəzən temperaturun yüksəlməsi, halsızlıq və qoxu hissinin zəifləməsi də müşahidə edilir.

 

Xətai Tibb Mərkəzinin həkim-terapevti Vəfa Bayramovanın sözlərinə görə, haymoritin müalicəsində xəstəliyin yaranma səbəbi əsas rol oynayır. Əgər xəstəlik viral mənşəlidirsə, yüngül simptomlarla müşayiət olunur və çox vaxt əlavə dərman müalicəsinə ehtiyac olmadan sağalır. Lakin bakterial infeksiyalar zamanı həkim tərəfindən antibiotiklər təyin edilə bilər. Simptomların yüngülləşdirilməsi üçün burun yollarının xüsusi məhlullarla yuyulması, buxar inhalyasiyası və iltihab əleyhinə dərmanlar istifadə olunur. Müalicə olunmayan haymorit uzun müddət davam etdikdə xroniki formaya keçə və bu da daha ciddi müalicə tələb edə bilər.

 

Vaxtında müalicə haymoritin ağırlaşmasının qarşısını almaq üçün əsas şərtdir. Özbaşına dərman qəbul etməmək və şikayətlər davamlı olduqda mütləq həkimə müraciət etmək vacibdir.