Hindistanda COVID-19 halları yenidən artmaqdadır. Ölkədə aktiv halların sayı 1010-a çatdığı halda, ən yüksək artım 335 yeni hadisə ilə Kerala əyalətində qeydə alınıb. Maharaştrada 153, Dehlidə 99 və Qucaratda 76 yeni hadisə qeydə alınıb. Pəncab ştatı ötən gün ilk hadisəni elan edib.

Azmedinfo.az “Medical Xpress”ə istinadən yazır ki, xəstəliklərin artması COVID-19-un iki yeni alt variantının, NB.1.8.1 və LF.7-nin aşkarlanması ilə üst-üstə düşüb.

Ümumdünya Səhiyyə Təşkilatı (ÜST) bu variantları yaxından izləyir. İlkin tapıntılar variantların yüksək yoluxucu ola biləcəyini göstərsə də, indiyədək xəstəliyin şiddətində ciddi artım müşahidə edilməyib.

Düşünülür ki, NB.1.8.1 insan hüceyrələrinə daha güclü bağlanma qabiliyyətinə malikdir və buna görə də əvvəlki variantlardan daha sürətli yayıla bilər.

Mütəxəssislər vurğulayırlar ki, yeni halların əksəriyyətində simptomlar yüngül xarakter daşıyır, ona görə də panikaya ehtiyac yoxdur. Bununla belə, əyalət hökumətləri ictimaiyyəti gigiyena qaydalarına diqqət yetirməyə çağırır. Hindistan Səhiyyə Nazirliyinin rəsmiləri xəstəxanaların mümkün artıma hazır olduqlarını bildiriblər.