İyunun 21-də Bakıda keçirilən “Mədə xərçənginə müasir baxış – hər yönü ilə mədə xərçəngi” adlı elmi-praktik konfrans çərçivəsində Azərbaycan Cərrahiyyə, Qastroenterologiya və Onkologiya Cəmiyyətinin sədr müavini, ümumi cərrah Elgün Səmədov Azmedinfo.az-a eksklüziv açıqlama verib. O, mədə xərçənginin ölkəmizdə yayılma səviyyəsi və bu sahədə qarşıda duran real hədəflərlə bağlı önəmli məqamları bölüşüb:

“Bugünkü statistikaya nəzər salsaq görərik ki, mədə xərçənginin rastgəlmə tezliyinə bizim ciddi təsir imkanımız yoxdur. Ölkə olaraq, kişilər arasında rastgəlmə tezliyinə görə dünyada 17-ci yerdəyik. Ümumiyyətlə, bizim coğrafiyada bu xəstəliyə tez-tez rast gəlinir.”

Elgün Səmədov bildirib ki, cəmiyyətlər, ictimai təşkilatlar, hətta dövlət dəstəyi ilə müxtəlif proqramlar həyata keçirsə belə, rastgəlmə tezliyini dəyişmək real olaraq mümkün deyil:

“Bu göstərici müxtəlif bioloji və coğrafi faktorların təsirində formalaşır. Amma biz daha mühüm bir istiqamətə fokuslana bilərik. Hazırda mədə xərçəngi Azərbaycanda xərçəngdən ölüm səbəbləri arasında 3-cü yerdə dayanır. Bu isə dəyişdirilə biləcək bir statistikadır.”

Onun sözlərinə görə, doğru yanaşma və vaxtında tətbiq olunan müasir diaqnostik və müalicə metodları ilə ölüm hallarının sayını azaltmaq mümkündür:

“Əsas vəzifəmiz rastgəlmə tezliyini azaltmaq yox, xərçəngə bağlı ölüm hallarını geri çəkmək olmalıdır. Bu, bizim əlimizdədir. Lazımi diaqnostika, müasir endoskopik texnologiyalar, hətta əməliyyata ehtiyacı az olan metodlarla mədə xərçəngi ilə mübarizədə ciddi uğurlar əldə etmək mümkündür.”

Mütəxəssis qeyd edib ki, bu məqsədə çatmaq üçün həm səhiyyə sistemində struktur yanaşmalar, həm də maarifləndirici fəaliyyətlər gücləndirilməlidir:

“Erkən diaqnostika və hədəflənmiş tibbi yanaşma nəticəsində xəstəliyin gedişatını dəyişə, pasiyentin həyat keyfiyyətini və sağqalım ehtimalını artıra bilərik. Bu baxımdan, hər bir tibbi konfrans bu istiqamətdə atılmış əhəmiyyətli addımdır.”