Türkiyənin İzmir vilayətində yerləşən bir arı təsərrüfatında allergiya, tənəffüs yolları xəstəlikləri və immun sistemi zəif olan insanlara dəstəkləyici müalicə prosesi kimi "arı havası" (api-air) tətbiq edilir.

Azmedinfo.az Türkiyə mətbuatına istinadla xəbər verir ki, hazırda təqaüddə olan əkinçilik texniki Hüseyn Ceylan anasının xərçəng xəstəliyindən müalicə aldığı dövrlərdə arı məhsullarının əhəmiyyətli təsir gücünə şahid olduğu üçün bu gün öz təsərrüfatında 400 arı pətəyi ilə "arı havası" tətbiqini həyata keçirir.

Apiterapiya Qədim Misir dövründən bəri məlumdur və bu kompleks müalicənin bir hissəsi arı pətəklərindən havanın istifadəsidir. Belə ki, pətəkdə olan bal, polen, propolis və bal mumu ətraf mühitin istiliyinə görə havaya qarışır. Bu hava xəstə tərəfindən aparat vasitəsilə tənəffüs edilir və müalicə aparılır.

Bu gün dünyanın müxtəlif ölkələrində bu məqsədlə yaradılmış müalicə mərkəzləri fəaliyyət göstərir. Və bu mərkəzlərə yüzlərlə insan müraciət edir. Bu evlərdə arıların və pətəklərin girişləri təcrid olunub, insanların arılarla əlaqəsi kəsilib. Gələn xəstələr müəyyən müddət ərzində bu havanı nəfəs alır və arının digər məhsullarından da faydalanırlar.

Arı pətəyində yaranan havanın inhalyasiyası insanın psixofiziki vəziyyətinə son dərəcə müsbət təsir göstərir. O, apreldən sentyabr ayına qədər qəbul edilə bilər.

Əhəmiyyətli qoxularla doymuş hava bronxit, astma, allergiya, xroniki ağciyər xəstəlikləri, infeksiyalara qarşı həssaslıq, immun sisteminin zəifliyi, tənəffüs yollarının infeksiyaları, xroniki baş ağrıları, miqren, stress və depressiya ilə mübarizədə mühüm dəstəkləyici müalicə funksiyasını yerinə yetirir.

Xüsusi tənəffüs maskası vasitəsilə isti arı pətəyinin havasını udmaqla, bir sıra müalicəvi təsirə malik olan bu qiymətli maddələri istehlak etmək mümkündür. Apiterapiya bizə bir çox problemlərin öhdəsindən təbii yolla qalib gəlməyə kömək edir. Bu, idmançılar, uşaqlar və yaşlılar üçün çox vacibdir.Tövsiyə olunan müalicə müddəti 3-12 gün ərzində hər biri 30 dəqiqə olmaqla, gündə iki dəfədir. Müalicənin təsiri altı-səkkiz həftəlik apiterapiyanın tamamlanmasından sonra görünür.

82 yaşlı Əli Hüseynin sözlərinə görə, 16 il öncə xərçəng xəstəliyindən müalicə aldığı zaman İzmirdə fəaliyyət göstərən apiterapiya mərkəzinə müraciət edib. O, nəinki xərçəngə qalib gəlib, bu günədək mütəmadi qəbul etdiyi "arı havası" ilə müalicə sayəsində heç bir xəstəlik keçirməyib.

ABŞ-dən olan bir ailənin bütün üzvləri COVİD-19 pandemiyasından sonra qoxu və dad itkisi şikayətləri ilə bu mərkəzə müraciət ediblər. İndi onların qoxu və dadbilmə qabiliyyəti yavaş-yavaş geri qayıtmağa başlayır.

Beləliklə, arının faydalı məhsulları ilə yanaşı, pətəyin içindəki hava da insanlar üçün şəfa mənbəyidir.