Malyariyaya yoluxmuş körpələr və 5 kiloqrama qədər kiçik uşaqların müalicəsində istifadə edilməsi üçün hazırlanan ilk antimalyariya dərmanı, İsveçrənin rəsmi dərman nəzarəti qurumu "Swissmedic" tərəfindən təsdiqlənib.

Azmedinfo.az yazır ki, BBC-nin xəbərinə əsasən, bu dərman "Swissmedic" testlərindən keçərək körpə və kiçik uşaqların müalicəsində istifadəsinə icazə verilən ilk antimalyariya dərmanı olub. Bu dərmanla köhnə müalicələrdə körpələrdə müşahidə olunan doza aşımı təhlükəsinə həll gətirilməsi hədəflənir.

İsveçrə mərkəzli Novartis əczaçılıq şirkəti tərəfindən hazırlanan dərmanın bir neçə həftə ərzində malyariya hallarının ən yüksək olduğu ölkələrdə qeyri-kommersiya əsasında istifadəyə verilməsi planlaşdırılır.

Swissmedic-in internet saytından verilən açıqlamada, sözügedən dərmanın digər ölkələrdə də təsdiqlənmə prosesini tamamladıqdan sonra bazara çıxarılacağı qeyd edilib.

Dərmanın qiymətləndirmə və sınaqlarında iştirak edən Afrika ölkələri Burkina Faso, Fil Dişi Sahili, Keniya, Malavi, Mozambik, Nigeriya, Tanzaniya və Uqandanın dərmanın ilk paylanacağı ölkələr arasında olması gözlənilir.

"Coartem Baby" və ya "Riamet Baby" adıyla tanınan dərman, Novartis və qeyri-kommersiya təşkilatı olan Sıtma Dərmanları Təşəbbüsü (MMV) ilə əməkdaşlıq çərçivəsində hazırlanıb.

Köhnə müalicələrdən fərqli olaraq, dozası sözügedən qrup üçün nəzərdə tutulmuş yeni dərman, 5 kiloqramdan yüngül uşaqlar və körpələr üçün təhlükəsiz hesab olunur.

Malyariyanın dünyanın ən ölümcül xəstəliklərindən biri olduğunu bildirən MMV-nin baş icraçı direktoru Martin Fitchet, doğru resurslar və fokuslanmış işlərlə xəstəliyin aradan qaldırıla biləcəyini ifadə edib.

Ümumdünya Səhiyyə Təşkilatının (ÜST) 2023-cü il məlumatlarına görə, malyariya böyük əksəriyyəti Afrikada olmaqla 597 min ölümə səbəb olub, ölümlərin 76%-ni 5 yaşından kiçik uşaqlar təşkil edir.