Həkimlərin narkomaniya və digər zərərli vərdişlərlə mübarizədə daha fəal olmasını təmin etmək məqsədilə həyata keçirilən növbəti “Yaşıl Aypara Könüllü həkimlər layihəsi”nə müraciətlər başlayıb.

Azmedinfo.az Yaşıl Aypara Cəmiyyətinə istinadla xəbər verir ki, adıçəkilən layihənin hədəfi zərərli vərdiş və aludəçiliyə qarşı mübarizə aparan, maarifləndirmə səyləri ilə öz təcrübələrini bölüşmək istəyən 5000 könüllü həkimi öz ətrafında birləşdirməkdir.

Layihə çərçivəsində ailə həkimlərindən tutmuş mütəxəssislərə qədər müxtəlif sahələrdən olan həkimlər təlimlər və digər xidmətləri vasitəsilə layihəyə dəstək verəcəklər. Təlim modulları, akademik tədqiqatlar, çoxistiqamətli sahə fəaliyyətləri və maarifləndirmə kampaniyaları ilə dəstəklənən bu layihə, eyni zamanda, dövlətin səhiyyə siyasətinə töhfə verəcək yeni elmi araşdırmaların, statistik məlumatların təqdim edilməsinə yol açır.

Asılılıqla mübarizə üçün Ümumdünya Səhiyyə Təşkilatı kimi beynəlxalq qurumlarla əməkdaşlıqda effektiv beynəlxalq strukturun yaradılması layihənin prioritetləri sırasındadır. Bu layihə sayəsində həkimlər alkoqol, tütün, narkotik maddə, qumar və internet asılılığı ilə bağlı qoruyucu, profilaktik və müalicəvi prosesləri aktiv şəkildə dəstəkləyəcəklər.

Xatırladaq ki, Yaşıl Aypara Cəmiyyəti 1920-ci ildə Birinci Dünya müharibəsi illərində və sonrasında işğalçı qüvvələrin türkiyəli gənclərdə alkoqol və narkotik maddələrdən asılılıq yaratmaq cəhdinin, habelə Türkiyə cəmiyyətində işğala qarşı mübarizə ruhunun məhv edilməsinin qarşısını almaq məqsədi ilə yaradılıb.

Bu gün 147 min nəfər könüllünü öz ətrafında birləşdirən Cəmiyyət dünyanın 65 ölkəsində zərərli vərdişlərlə məqsədyönlü və uğurlu mübarizə aparır.

“Yaşıl Aypara Könüllü həkimlər layihəsi”nə qoşulmaq istəyən həkimlər Yaşıl Aypara Cəmiyyətinin rəsmi veb-saytındakı ərizə formasını dolduraraq prosesdə iştirak edə bilərlər.