Dərin damar trombozu genetik faktorlar və bəzi dərmanlardan istifadə səbəbindən, həmçinin uzun müddət hərəkətsizlikdən sonra ayaq damarlarında laxtalanma meydana gəldiyi zaman inkişaf edən damar xəstəliyidir.

Azmedinfo.az-ın verdiyi xəbərə görə, mütəxəssislər  yay aylarında temperaturun yüksəlməsinin, uzun müddət davam edən uçuş və digər səfərlər zamanı hərəkətsizliyin, maye itkisinin dərin damar trombozu riskini artırdığını bildiriblər.

Dərin damar trombozu riski yüksək olan insanların səyahətdən əvvəl mütləq həkim müayinəsindən keçmələrinin əhəmiyyətindən danışan türkiyəli ürək-damar cərrahı, professor Mete Gürsoy "60 yaşdan yuxarı insanlar, aktiv xərçəng xəstələri, əvvəllər dərin damar trombozu və ya ağciyər emboliyasından əziyyət çəkən şəxslər, genetik laxtalanma pozğunluğu və ya varikoz damarları olanlar, hamilə qadınlar, hormon  müalicəsi alan şəxslər risk qrupundadır" - deyə vurğulayıb. Onun fikrincə, sadə ehtiyat tədbirləri görməklə bu təhlükənin qarşısı böyük miqyasda alına bilər.

Bəs nə etməli?

Səyahətdən əvvəl 10-15 dəqiqəlik gəzinti ilə ayaq əzələlərini aktivləşdirmək, hər 1,5-2 saatdan bir fasilə verib qısamüddətli piyada gəzmək, təyyarə, avtobus və ya qatar kimi nəqliyyat vasitələrində müəyyən fasilələrlə qalxıb-əyləşmək, oturarkən topuqlar üçün yüngül idman məşqləri etmək, bol su içmək və alkoqoldan uzaq durmaq, rahat, dar olmayan paltarlar geyinmək, risk qrupuna daxil olan şəxslərin varikoz üçün corabdan istifadə etməsi vacibdir.

Azərbaycan Tibbi İnformasiya və Səhiyyə Portalı - azmedinfo.az izləyicilərinə hər zaman sağlam və xoşbəxt həyat, maraqlı və yaddaqalan istirahət etmələrini diləyir.