Azərbaycanın sağlamlıq turizmi potensialının beynəlxalq miqyasda tanıdılması və bu sahənin təbliği istiqamətində Dövlət Turizm Agentliyi tərəfindən fəal və sistemli işlər həyata keçirilir.

Azmedinfo.az xəbər verir ki, bu barədə Trend informasiya agentliyinin sorğusuna cavab olaraq Dövlət Turizm Agentliyindən məlumat verilib. Bildirilib ki, Azərbaycan Turizm Bürosunun təşəbbüsü ilə xarici turizm sərgilərində ölkənin sanatoriya-kurort müəssisələri də iştirak edir və bu sahədə tanıtım fəaliyyətlərinə töhfə verirlər.

Məlumata əsasən, son illərdə sağlamlıq turizminə olan marağın artması ilə əlaqədar bir sıra yerli turizm şirkətləri sanatoriya və müalicə müəssisələri ilə əməkdaşlıq çərçivəsində turpaketlər hazırlayır. 2024-cü ilin statistik göstəricilərinə görə, Azərbaycanın sağlamlıq turizmi xidmətlərindən yararlanmaq məqsədilə ümumilikdə 23 272 xarici vətəndaş ölkəyə səfər edib. Onlardan təxminən 83,4%-i MDB ölkələrindən gələnlər olub.

Ən çox turist qəbul edilən ölkələr sırasında Rusiya (15 360 nəfər) birinci yerdədir. Daha sonra Qazaxıstan (2 199 nəfər), Türkiyə (1 311 nəfər), Gürcüstan (1 068 nəfər) və Özbəkistan (935 nəfər) gəlir. İlk onluğa Qırğızıstan, Türkmənistan, Tacikistan, Ukrayna və Belarus da daxildir.

Bununla yanaşı, iyulun 17-də keçirilmiş "Sağlamlıq turizminin inkişafı üzrə işçi qrupun"un iclasında müxtəlif dövlət qurumlarının nümayəndələri və ekspertlər iştirak ediblər. İclasda İqtisadiyyat Nazirliyi, Səhiyyə Nazirliyi, SOCAR, AMEA, İcbari Tibbi Sığorta üzrə Dövlət Agentliyi, TƏBİB, AQTA, Ekologiya və Təbii Sərvətlər Nazirliyi yanında Geoloji Kəşfiyyat Agentliyi və Naftalan Şəhər İcra Hakimiyyəti təmsil olunub.

Toplantıda əsas müzakirə mövzusu, “Sağlamlıq turizminin inkişafında Naftalan neftinin rolunun artırılması ilə bağlı əlavə tədbirlər haqqında” Azərbaycan Respublikası Prezidentinin 28 sentyabr 2024-cü il tarixli, 308 nömrəli Sərəncamının və Nazirlər Kabinetinin 8 oktyabr 2024-cü il tarixli, 515s nömrəli Sərəncamının icrasının cari vəziyyəti olub.

Həmçinin, “Naftalan” kurortunda turistlərin asudə vaxtlarının təşkili məsələsi ətrafında geniş fikir mübadiləsi aparılıb. Bildirilib ki, sağlamlıq məqsədilə Naftalana gələn turistlərin müalicə müəssisələrindən yararlanması ilə yanaşı, onların mədəni və sosial fəaliyyətlərə çıxışı da genişləndirilməlidir. Bu baxımdan, infrastrukturun inkişaf etdirilməsi və əyləncə imkanlarının artırılması istiqamətində əlavə tədbirlərə ehtiyac olduğu vurğulanıb.