Hər il 1–7 avqust tarixləri dünyada "Ümumdünya Ana Südü ilə Qidalanma Həftəsi" kimi qeyd olunur.

Azmedinfo.az UNICEF-in hesabatına istinadən yazır ki, beynəlxalq miqyasda "körpələrin ilk peyvəndi" hesab edilən ana südü və əmizdirmə, ana və uşaq sağlamlığında mühüm rol oynayır və hər il 500 mindən artıq ölümün qarşısını alır.

BMT-nin Uşaq Fondunun (UNICEF) hər il dərc etdiyi “Qlobal Əmizdirmə Hesabat Kartı”na görə, BMT-nin 2030-cu ilə qədər müəyyənləşdirdiyi Davamlı İnkişaf Məqsədləri arasında əmizdirmə xüsusi yer tutur.

Bu məqsədlər çərçivəsində BMT 2030-cu ilə qədər dünyada 6 ayadək körpələrin ən azı 60%-nin yalnız ana südü ilə qidalanmasını hədəfləyir.

UNICEF-in məlumatına əsasən, hazırda dünyada 6 ayından kiçik körpələrin 48%-i yalnız ana südü ilə qidalanır. Bu göstərici 2012-ci illə müqayisədə 10% artım deməkdir.

Ana südü ilə qidalanmanı və əmizdirməni təşviq etmək üçün bir çox ölkədə hökumətlər və qeyri-hökumət təşkilatları müxtəlif siyasətlər həyata keçirirlər. Bunlara aşağıdakılar daxildir:

Əmizdirməyə ayrılan vəsaitlərin artırılması

Ödənişli doğum və əmizdirmə məzuniyyətlərinin verilməsi

Doğum evlərində uğurlu əmizdirmə siyasətlərinin tətbiqi

Peşəkar laktasiya (əməzdirmə) məsləhətlərinin göstərilməsi

Əmizdirmənin həyat qurtaran təsiri

Kanadada yerləşən “Nutrition International” təşkilatının 2022-ci ildə dərc etdiyi “Əmizdirməməyin Bədəli” adlı hesabatında təqdim olunan məlumatlar da UNICEF tərəfindən əsas kimi istifadə olunub.

Hesabata görə, əmizdirmə həm ana və uşaq sağlamlığını qoruyur, həm də dünya iqtisadiyyatında təqribən 574 milyard dollarlıq itkini önləyir.

Körpə ölümlərinin ən çox rast gəlinən səbəbləri ishal və pnevmoniyadır. Hesabatda qeyd edilir ki, həyatının ilk 6 ayında ana südü almayan körpələr bu xəstəliklərə qarşı daha həssas olurlar. Ana südü sayəsində hər il 420 mindən çox körpənin həyatı xilas edilir.

Bundan əlavə, ana südü hər il 4,6 milyon uşaqda piylənmənin qarşısını alır.

Əmizdirmə həmçinin uşaqlıq, döş xərçəngi və tip 2 diabet kimi xəstəliklərin qarşısını almaqla hər il 90 minə yaxın qadının həyatını qoruyur.

Hesabatda, ana südü ilə qidalanmanın uşaqların zehni inkişafına təsirinə də diqqət yetirilir.

Əgər uşaq kifayət qədər ana südü almırsa, bu onun zehni qabiliyyətlərinə və öyrənmə potensialına mənfi təsir göstərir və nəticədə akademik göstəriciləri aşağı olur.

Ana südü alan uşaqlarda IQ səviyyəsinin orta hesabla 2,6 xal artdığı da vurğulanır.