Süd vəzilərinin sağlamlığına diqqət ilk növbədə diaqnostik müayinə ilə başlamalıdır. Artıq bütün dünyada yanaşma dəyişib, əgər əvvəllər qadınlar mamoloq, ginekoloq və ya onkoloqa yönləndiriləndən sonra radioloqa müraciət edə bilirdilərsə, indi hər bir qadın birbaşa şüa-diaqnostika həkiminə müraciət edərək ilkin müayinəni həyata keçirə bilər. Bunun tək bir səbəbi var düzgün diaqnostika!

Azmedinfo.az xəbər verir ki, bu fikirləri radioloq Sevinc Musayeva bildirib.

Həkim qeyd edir ki, 11–12 yaşdan etibarən bütün qız uşaqlarında süd vəziləri ultrasonoqrafiya ilə yoxlanıla bilər. 35 yaşdan sonra isə mamoqrafiya və tomosintez müayinəsi aparılması tövsiyə olunur. Lakin bu yanaşma hər kəs üçün fərdidir. Hər bir qadına subyektiv, fərdi şəkildə yanaşmaq vacibdir. Ailə anamnezini, yəni genetik və risk faktorlarını diqqətlə araşdırmaq lazımdır. Əgər birinci nəsil qohumlarda süd vəzi xərçəngi olubsa, bu, müayinələrin tezliyinə və seçiminə birbaşa təsir edir.

Sevinc Musayeva əlavə edib ki, MRT, biopsiya kimi daha dərin diaqnostik metodlar da mövcuddur və bu üsullar erkən mərhələdə xəstəliyin aşkarlanmasında böyük əhəmiyyət daşıyır.

“Əziz xanımlar, müayinəyə gəlmək "siz xərçəngsiniz" demək deyil. Tam əksi, bu, sağlamlığınızı qorumaq üçün atılan ən mühüm addımdır. Dünyada hər 8 qadından biri süd vəzi xərçənginə tutulursa, o qadın siz olmayın! Vaxtında müayinələrə gedin, sağlam qalın,” – deyə radioloq Sevinc Musayeva qadınlara müraciət edir.