Süni intellektin sürətli inkişafına söykənən rəqəmsallaşma bu gün məhkəmə təbabətində ekspert rəylərindən tutmuş autopsiya nəticələrinin təhlilinə, cinayət araşdırmalarından məlumatların qiymətləndirilməsinə qədər geniş arealı öz təsiri altına alıb desək, yanılmarıq.

azmedinfo.az xəbər verir ki, Türkiyənin Ədliyyə Nazirliyi 2026-cı ildən etibarən süni intellekt tərəfindən dəstəklənən məhkəmə-tibbi ekspertiza proseslərində yeni eraya qədəm qoymağa hazırlaşır. Məhkəmə Tibbi Ekspertizası institutlarının işini sürətləndirmək və hesabat potensialını artırmaq üçün texnoloji infrastruktur tamamilə yenilənəcək.

Yeni sistem tibbi tapıntıların daha sürətli şərh edilməsinə, sübutların daha dəqiq təhlilinə və xəta həddinin minimuma endirilməsinə yönəlib. Qeyd edək ki, süni intellektin köməyi ilə ekspert rəylərinin gücləndirilməsi həm məhkəmə proseslərinin sürətləndirilməsinə, həm də məhkəmə proseslərinin etibarlılığının artırılmasına töhfə verəcək.

BMT-nin Beynəlxalq Narkotiklərə Nəzarət Şurasının sədri, türkiyəli professor Sevil Atasoyun sözlərinə görə, klassik üsullarla həftələrlə davam edən tibbi təhlillər artıq süni intellektin sayəsində bir neçə saat ərzində tamamlanacaq. Bu, nəinki məhkəmələrin tibbi ekspertiza rəylərini gözləmə müddətini qısaldacaq, eyni zamanda ekspertlərin iş yükünü balanslaşdıracaq. S.Atasoy, həmçinin "süni intellekt sayəsində DNT profilinin yaradılması, toksikologiya nəticələrinin müqayisəsi və ya barmaq izi təhlili kimi proseslər, eləcə də autopsiya proseslərində təsvir tanıma alqoritmləri travma, sınıqlar, qanaxma və ya yad cisimləri aşkar etməklə məhkəmə ekspertinə ilkin məlumat verə bilər. Süni intellekt tətbiqlərinin daha bir mühüm töhfəsi obyektivliyin və ardıcıllığın artmasıdı" - deyə diqqətə çatdırıb.

Bəzi məhkəmə təbabəti mütəxəssislərin qənaətincə, süni intellekt nə qədər inkişaf etmiş olursa olsun, həmişə səhv etmək riski daşıyır. Xüsusilə, ölüm səbəbi, DNT analizi və ya cinayət sübutlarının araşdırılması kimi həssas məsələlərdə səhv qiymətləndirmə apararsa, bunun çox ciddi nəticələri ola bilər. Bu səbəbdən, süni intellekt tərəfindən hazırlanan hər bir müayinə nəticəsinin, məhkəmə-tibbi ekspertiza hesabatının ekspertlər tərəfindən yoxlanılması vacibdir.