Şampan şərabı tünd içkilərlə müqayisədə daha az alkoqollu olsa da, xüsusilə həzm sistemi problemi olan şəxslərin orqanizminə mənfi təsir göstərə bilər. Hətta kiçik bir porsiya alkoqol mədə xorası olan xəstələrdə mədə şirəsi ifrazının kəskin artmasına təkan verir, bu isə mədə divarlarının qıcıqlanmasına və sağalma prosesinin ləngiməsinə səbəb olur.

Azmedinfo.az "Medijforum"a istinadən xəbər verir ki, qastroenteroloq Svetlana Minqazovanın sözlərinə görə, xroniki qastritdən əziyyət çəkənlər üçün cəmi bir qədəh köpüklü şərab xəstəliyin kəskinləşməsi ilə nəticələnə bilər. Qıcıqlanmış bağırsaq sindromu da tərkibindəki qazlar və yüksək turşuluq səbəbindən şampan qəbulu ilə daha da pisləşərək ağrı və spazmlara yol açır. Qeyri-spesifik xoralı kolit və ya Kron xəstəliyi olan pasiyentlərdə isə alkoqol iltihab proseslərini gücləndirərək ümumi vəziyyəti pisləşdirə bilər.

Bundan əlavə, şampanın tərkibindəki yüksək şəkər miqdarı qanda qlükoza səviyyəsini əhəmiyyətli dərəcədə artırdığı üçün bu içki diabet və insulin müqaviməti olan insanlara tövsiyə edilmir. Köpüklü şərabın qəbulu xüsusilə pankreatit və öddaşı xəstəliyi zamanı təhlükəlidir, çünki o, mədəaltı vəzini qıcıqlandıraraq ağrıları kəskinləşdirir.

Qaraciyər və böyrək xəstəlikləri olan, eləcə də allergiyaya meylli şəxslər üçün də şampan arzuolunmazdır. İçkinin tərkibindəki çoxsaylı qabarcıqlar səbəbindən bir çox sağlam insan belə onu qəbul etdikdən sonra ağır asılqanlıq (paxmel) hissi yaşayır. Miqrendən əziyyət çəkənlərə və alkoqolu çətin həzm edənlərə bayram günlərində şampandan uzaq durmaq məsləhət görülür.