“Ən ağır anda belə başqasına həyat vermək böyük ürək tələb edir”

09 Fevral 2026

436

“Ən ağır anda belə başqasına həyat vermək böyük ürək tələb edir”

Məmmədəliyev Rəşad ölkəmizdə ürək transplantasiyası əməliyyatı keçirən ilk pasiyentdir. Onun ürək problemi qəfil ortaya çıxıb və zamanla daha da şiddətlənib. Həkimlərin rəyinə görə, Rəşadın yaşaması üçün yeganə çıxış yolu ürək transplantasiyası idi. Bu xəbər ailə üçün həm ümid, həm də sınaq oldu. Çünki ürək nəqli hər zaman əlçatan olmur və Azərbaycanda həmin vaxta qədər belə bir əməliyyat icra edilməmişdi. Uzun və gərgin hazırlıq mərhələsindən sonra transplantasiya uğurla həyata keçirildi. Əməliyyat təkcə Rəşadın həyatını xilas etmədi, həm də eyni vəziyyətdə olan, ürək nəqlinə ehtiyacı olan insanlar üçün ümid qapısı açdı.

Azmedinfo.az Orqan Donorluğu və Transplantasiyası üzrə Koordinasiya Mərkəzinin məlumatı əsasında ölkəmizdə ilk dəfə ürək transplantasiyası ilə həyata dönən Rəşad Məmmədəliyevin təsirli həyat hekayəsini təqdim edir.

Rəşadın anası Fəridə xanım bildirir ki, bu prosesdə bir çox insanın zəhməti və fədakarlığı var. Fəridə xanım ilk növbədə Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzinə, eləcə də əməliyyatı həyata keçirən cərrah Kamran Musayevə və bütün tibbi heyətə dərin təşəkkürünü bildirir.

Eyni zamanda vurğulayır ki, bütün bu səylərin mərkəzində ən vacib və həlledici rol donor ailəsinə məxsusdur. Məhz onların verdiyi nəcib qərar bir neçə insanın yenidən həyata qayıtmasına səbəb olub. Fəridə xanım donor ailəsinin bu addımını insanlığın ən ali nümunəsi kimi qiymətləndirir və onlara sonsuz minnətdarlığını ifadə edir.

Rəşad özü də donor ailəsinə dərin təşəkkürünü bildirir: “Onlar mənə təkcə bir ürək deyil, bir həyat bağışladılar. Ən ağır anlarında belə başqa bir insanın yaşamasını düşünmək böyük ürək tələb edir.”

Qeyd edək ki, Fəridə xanım da rəsmi olaraq orqanlarını bağışlayıb. Oğlu ürək nəqli ilə həyata qayıdan ana bütün valideynlərə və cəmiyyətə müraciət edərək orqan donorluğu barədə ciddi düşünməyə, bu mövzunu ailədə müzakirə etməyə çağırır: “Heç kim bilmir sabah kimin ümidə ehtiyacı olacaq. Gəlin, orqanlarımızı bağışlayaq, bir-birimizə həyat bəxş edək.”

Azərbaycanda ilk ürək transplantasiyası tibb tariximizdə yeni bir mərhələnin başlanğıcı kimi qiymətləndirilir və orqan donorluğu ilə bağlı ictimai maarifləndirmənin əhəmiyyətini bir daha ön plana çıxarır.