ATU otolarinqoloqlarından yüksək dəqiqlik tələb edən uğurlu cərrahi müdaxilə

12 May 2026

450

ATU otolarinqoloqlarından yüksək dəqiqlik tələb edən uğurlu cərrahi müdaxilə

ATU-nun Tədris Cərrahiyyə Klinikası otolarinqoloqları kafedra müdiri, professor Vəfa Pənahian, dosent Ayaz Qasımov, dosent Sara Ağalarova və assistent Fəridə Əbilova tərəfindən 12 yaşlı pasiyentdə radikal mastoidektomiya əməliyyatı uğurla həyata keçirilib.

Azmedinfo.az xəbər verir ki, pasiyent orta qulaq və antrum nahiyəsini əhatə edən qranulyasion toxuma ilə müraciət edib. Xəstədə əsasən eşitmənin konduktiv tipdə zəifləməsi və irinli ifrazat müşahidə olunub.

Aparılan müayinələrdən sonra qranulyasion toxumaların aradan qaldırılması məqsədilə radikal mastoidektomiya əməliyyatının icrasına qərar verilib. Əməliyyat zamanı qulağın arxa hissəsindən kəsik aparılaraq antrum (mağara) nahiyəsinə daxil olunub, qranulyasion toxumalar xaric edilib və orta qulaqla əlaqələndirici keçidlər təmizlənib.

Bildirilib ki, bu tip əməliyyatlar yüksək dəqiqlik tələb edir. Belə ki, əməliyyat sahəsindən üz siniri keçdiyindən onun zədələnməsi “fasiya lis” (üz siniri iflici) kimi ağırlaşmalara səbəb ola bilər. Eyni zamanda, mastoid çıxıntı nahiyəsində yerləşən yarımdairəvi kanalların zədələnməsi başgicəllənmə və daxili qulaq funksiyasının pozulması ilə nəticələnə bilər.

Qeyd edək ki, xəstə bir neçə ay əvvəl burun və udlaq nahiyəsində iltihabi prosesin aradan qaldırılması məqsədilə adenotonzillektomiya əməliyyatı da keçirib. Hazırda isə əsas problemə səbəb olan qulaq patologiyası cərrahi yolla aradan qaldırılıb.

Sonda vurğulanıb ki, vaxtında və düzgün aparılan cərrahi müdaxilə eşitmə funksiyasının qorunmasında və ağırlaşmaların qarşısının alınmasında mühüm əhəmiyyət daşıyır.