Səhiyyə Nazirliyi Elmi-Tədqiqat Kardiologiya İnstitutunun direktoru, professor Gülnaz Dadaşova hər bir insanın mütləq bilməli olduğu və gizli təhlükələrdən qoruyan mühüm laborator müayinələrlə bağlı vətəndaşlara müraciət edib.

Azmedinfo.az xəbər verir ki, professor müraciətində hər kəsi öz sağlamlığına qarşı diqqətli olmağa çağırıb:

"Sizə bir sual verim: Ürəyinizin hazırkı vəziyyətini həqiqətən bilirsinizmi? Yoxsa heç bir yeriniz ağrımadığı üçün özünüzü tam sağlam hesab edirsiniz? Bu gün hər bir insanın mütləq bilməli olduğu və vaxtında verildikdə həyatınızı qurtara biləcək üç ən vacib analizdən danışacağam".

Gülnaz Dadaşovanın sözlərinə görə, birinci mühüm müayinə xolesterin analizidir: "Bir çox insanın yol verdiyi ciddi bir səhv var. Bəzən sadəcə ümumi xolesterinin səviyyəsinə baxılır ki, bu da tam mənzərəni görmək üçün kifayət deyil. Ürək-damar sağlamlığını dəqiq qiymətləndirmək üçün aşağı sıxlıqlı lipoproteinlər, yüksək sıxlıqlı lipoproteinlər, triqliseridlər və aterogenlik indeksi birlikdə analiz edilməlidir.

İnsanlar arasında yayılan yanlış təsəvvürlərə aydınlıq gətirən professor qeyd edib: "Çoxları elə düşünür ki, əgər bədən quruluşu arıqdırsa, deməli xolesterin də normal olmalıdır. Lakin bu yanaşma doğru deyil, biz çox vaxt praktikada bunun tam tərsini görürük. Eyni zamanda, irsi xarakter daşıyan ürək-damar xəstəliklərini öncədən proqnozlaşdırmağa imkan verən 'Lipoprotein (a)' analizinin də edilməsi son dərəcə zəruridir".

Kardioiloq qeyd edib ki, ikinci vacib müayinə qlikozilləşmiş hemoqlobin analizidir. Bu göstərici son üç ay ərzində qanda olan şəkərin orta miqdarını tam dəqiqliyi ilə əks etdirir. Analizin ən böyük üstünlüyü ondan ibarətdir ki, o, adi acqarına qan analizində görünməyən gizli şəkərli diabeti erkən mərhələdə aşkara çıxarmağa imkan verir.

Həkim üçüncü mühüm göstəricinin isə yüksək həssaslıqlı C-reaktiv zülal analizi olduğunu bildirib: "Bu laborator göstərici orqanizmdə gedən və heç bir simptom verməyən gizli iltihab proseslərini, eləcə də yaxın gələcəkdə yarana biləcək ürək-damar risklərini aydınlaşdırmaq üçün həlledici rol oynayır".

"Sevindirici haldır ki, qeyd etdiyim bu həyatı analizlərin hamısı institutumuzun ən müasir, yüksək texnologiyalı laboratoriyasında icbari tibbi sığorta çərçivəsində tam ödənişsiz olaraq həyata keçirilir. Unutmayın, ürəyinizi qoruyun və sevin, çünki onun içində sevdikləriniz var", - sonda professor vurğulayıb.