Ekspertimiz - M.Topçubaşov adına Elmi Cərrahiyyə Mərkəzinin Yoğun və düz bağırsaq cərrahlığı şöbəsinin müdiri, tibb üzrə fəlsəfə doktoru Nərgiz Məmmədova rektosele əməliyyatına qərar verərkən nəzərə alınmalı vacib amillərdən, prosedurun potensial risklərindən və ən effektiv müalicə yanaşmalarından danışıb.

Rektosele problemi yaşayan pasiyentlər üçün düzgün müalicə metodunu seçmək hansı faktorlardan asılıdır?

Hansı hallarda cərrahi müdaxilə qaçılmaz olur?

Əməliyyat sonrası bərpa prosesi necə keçir?

Azmedinfo.az oxucularına rektosele əməliyyatı ilə bağlı vacib məqamları və tanınmış həkim, cərrah Nərgiz Məmmədovanın dəyərli tövsiyələrini təqdim edir.

Rektosele dərəcəsinin müəyyən olunması

Nərgiz Məmmədova bildirir ki, rektosele əməliyyatına qərar verilməzdən əvvəl, ilk növbədə xəstəliyin dərəcəsi dəqiqliklə müəyyən edilməlidir. Xəstəliyin ilkin mərhələlərində diaqnoz, əsasən, pasiyentin şikayətləri və obyektiv müayinə nəticələrinə əsasən qoyulur. Bəzi hallarda xəstədə rektosele olsa belə, heç bir ciddi narahatlıq müşahidə olunmur. Belə vəziyyətlərdə bağırsağın peristaltik fəaliyyəti kifayət qədər normal işlədiyindən xəstə gündəlik həyatında heç bir çətinlik hiss etmir.

Əgər pasiyentin şikayətləri varsa və bu vəziyyət onun gündəlik həyat keyfiyyətinə mənfi təsir edirsə, mütləq peşəkar müayinə aparılmalı və xəstəliyin dərəcəsi dəqiq təyin edilməlidir. Həkimin sözlərinə görə, cərrahi müdaxiləyə ehtiyac olub-olmadığı yalnız bu şikayətlərin əsasında müəyyən olunur.

Cərrahi müdaxilənin riskləri

Rektosele əməliyyatı zamanı yaranan risklərdən bəhs edən Nərgiz Məmmədova xüsusilə vurğulayır ki, bu prosedur əsasən uşaqlıq yolunun arxa divarı üzərində aparılır. Təcrübəli cərrahlar belə bu incə əməliyyat zamanı yüksək diqqət tələb olunduğunu bildirirlər. Əgər cərrahi müdaxilə texniki cəhətdən düzgün aparılmazsa, düz bağırsağın ön divarı zədələnə bilər.

Həkim bu risklə bağlı daha ətraflı izah edib: "Əməliyyat zamanı baş verən bu cür zədələnmələr bəzən dərhal hiss olunmur. Lakin sonradan pasiyentdə rektovaginal fistul deyilən ağır bir patologiya yarana bilər. Belə hallarda nəcis düz bağırsaqdan uşaqlıq yoluna keçə bilər ki, bu da olduqca təhlükəli bir ağırlaşmadır. Bundan əlavə, əgər əməliyyat düzgün aparılmazsa, xəstənin ilkin şikayətləri olduğu kimi qala bilər."

Mütəxəssis əlavə edir ki, əməliyyat zamanı əsas məqsəd düz bağırsağın əzələlərini düzgün müəyyən edərək qaçan toxuma liflərini bərpa etməkdir. Yalnız bu şərtlər yerinə yetirildikdə əməliyyat uğurlu alınır və xəstənin həyat keyfiyyəti yaxşılaşır.

Beləliklə, rektosele əməliyyatı ciddi peşəkarlıq və dəqiqlik tələb edən bir prosedurdur. Pasiyentlərin əməliyyat barədə ətraflı məlumat alaraq, təcrübəli və ixtisaslaşmış mütəxəssislərə müraciət etməsi bu prosesin uğurlu nəticələnməsində əsas amillərdən biridir.

Həkimlə əlaqə:

Telefon: (+994) 50 3232368

               (+994) 99 3232368