Ötən həftə Bakıda keçirilən Beynəlxalq Radiofarmasevtik Terapiya Simpoziumu – ISRT 2025 onkoloji xəstəliklərin müalicəsində radionuklid terapiya sahəsində son yeniliklərin təqdimatı və dərin elmi müzakirələrlə yadda qalıb.

Azmedinfo.az xəbər verir ki, simpozium Ümumdünya Radiofarmasevtik və Molekulyar Terapiya Assosiasiyası (WARMTH) və Azərbaycan Nüvə Təbabəti Cəmiyyətinin (ASNM) birgə təşkilatçılığı ilə baş tutub.

Tədbirdə dünyanın müxtəlif ölkələrindən gəlmiş tanınmış mütəxəssislər, alimlər və tibb sahəsində aparıcı klinik təcrübəyə malik həkimlər radionuklid diaqnostika və müalicə metodları, eləcə də onların klinik praktikadakı effektivliyi mövzusunda fikir mübadiləsi aparıblar. Əsas vurğulanan məqamlardan biri multidisiplinar yanaşmanın onkoloji xəstəliklərin bütün mərhələlərində əhəmiyyəti olub.

Simpoziumda nüfuzlu həkim-onkoloq, klinik praktikada və elmi araşdırmalarda təcrübəsi ilə tanınan Azərbaycan Cərrahiyyə, Qastroenterologiya və Onkologiya Cəmiyyətinin sədri Dr. Altay Əliyev hepatosellular xərçəngin müalicə tarixi və yeni yanaşmalarla bağlı məruzə ilə çıxış edib. O, keçmişdə geniş tətbiq edilən sitotoksik kimyaterapiya metodlarının məhdud effektindən söz açaraq, son onillikdə tətbiq edilən immunterapiya və tirozinkinaz inhibitorları ilə bağlı beynəlxalq tədqiqatların nəticələrini dəyərləndirib.

Həkim müasir onkologiyanın ən aktual istiqamətlərindən biri olan kombinasiya terapiyası barədə geniş məlumat verərək, immun və hədəf müalicə yanaşmalarının transarterial kemoembolizasiya və transarterial radyoembolizasiya kimi invaziv prosedurlarla birgə tətbiqinin klinik nəticələrini təqdim edib. Onun təqdim etdiyi məlumatlar sağqalım müddətləri və xəstəliksiz sağqalım göstəricilərinin əhəmiyyətli şəkildə yaxşılaşdığını göstərib.

Dr. Altay Əliyevin çıxışı, yalnız elmi baxımdan deyil, həm də klinik praktikada tətbiq imkanları baxımından böyük maraq doğurub və simpozium iştirakçıları tərəfindən yüksək qiymətləndirilib.

Qeyd edək ki, WARMTH radiofarmasevtik terapiya və terapevtik nüvə təbabətinin inkişafını təşviq edən, bu sahədə bilik və təcrübə mübadiləsini dəstəkləyən qlobal qeyri-kommersiya təşkilatıdır. Təşkilat radionuklid terapiyaya qlobal çıxışın artırılması, elmi biliklərin yayılması və bəşəriyyətin sağlamlığı üçün teraqnostik yanaşmanın geniş tətbiqini öz missiyası hesab edir.

Azərbaycan tərəfdaşı olan ASNM isə ölkədə nüvə təbabətinin inkişafını, müasir müalicə metodlarının tətbiqini və bu sahədə kadr potensialının artırılmasını qarşısına məqsəd qoyub.

ISRT 2025 təkcə region üçün deyil, bütün dünya üzrə terapevtik nüvə təbabəti sahəsində əməkdaşlığın və bilik inteqrasiyasının gücləndirilməsi baxımından mühüm addım olub.