İyunun 21-də Bakıda Liv Bona Dea Beynəlxalq Hospitalında “Mədə Xərçənginə Müasir Baxış – hər yönü ilə mədə xərçəngi” adlı elmi-praktik konfrans öz işinə başlayıb.

Tədbir Azərbaycan Respublikasının Dövlət Himninin səsləndirilməsi ilə açılıb.

Tədbirdə çıxış edən Liv Bona Dea Hospitalın baş həkimi Cabir Gülmalıyev konfransı açıq elan edib, konfransın mövzusunun həkim və cərrahlar üçün önəmini diqqətə çatdırıb. Baş həkim konfrans iştirakçılarına uğurlar arzulayıb.

Konfransa Azərbaycan Cərrahiyyə, Qastroenterologiya və Onkologiya Assosiasiyasının sədri, tanınmış alim Altay Əliyev rəhbərlik edib. Konfransın sədri plenar iclasda çıxışı zamanı mədə xərçənginin ölkəmizdə və dünyada artan statistikası fonunda bu cür tədbirlərin zəruriliyini vurğulayıb, multidisiplinar əməkdaşlığın gücləndirilməsinin vacibliyini diqqətə çatdırıb.

Səhiyyə Nazirliyinin və Azərbaycan Cərrahiyyə, Qastroenterologiya və Onkologiya Assosiasiyasının təşkilatçılığı ilə keçirilən, eləcə də Azmedinfo.az səhiyyə portalının informasiya dəstəkçisi olduğu bu elmi-praktik konfransın əsas məqsədi mədə xərçənginin erkən diaqnostikasını təşviq etmək, xəstəliyin erkən mərhələdə aşkarlanmasının xəstə sağqalımı və müalicə effektivliyi baxımından əhəmiyyətini vurğulamaq, müasir müalicə protokolları və texnologiyalarla tanışlıq, onkoloji, cərrahi və endoskopik yanaşmalardakı yenilikləri mütəxəssislərlə paylaşmaq, multidisiplinar əməkdaşlığı gücləndirmək, onkoloq, qastroenteroloq, cərrah və patoloq kimi müxtəlif ixtisas sahibləri arasında klinik əməkdaşlığı artırmaq, elmi məlumat və təcrübə mübadiləsi yaratmaq, həkimlər arasında klinik təcrübələrin, yerli və beynəlxalq araşdırmaların təqdim olunmasına şərait yaratmaq və həkimlərin davamlı tibbi təhsilini dəstəkləməkdir.

Konfransda mədə xərçənginə dair müasir tibb elminin, səhiyyə və cərrahiyyənin aktual çağırışlarına cavab verən məruzələr dinləniləcək. Konfransın proqramında, total və subtotal qastrektomiyaya dair cərrahi əməliyyatın canlı bağlantı vasitəsilə təqdimatı da yer alıb.

Elmi konfrans Azərbaycan Səhiyyə Nazirliyinin Elmi Tibbi Şurası tərəfindən Davamlı Tibbi Təhsil (DTT) krediti ilə akkreditasiya olunacaqdır.