Azmedinfo.az-a verilən məlumatya görə, Azərbaycan Respublikası Səhiyyə Nazirliyi və Macarıstanın ölkəmizdəki səfirliyin təşkilatçılığı ilə keçirilən tədbirdə giriş sözü ilə çıxış edən səhiyyə naziri Teymur Musayev ulu öndər Heydər Əliyevin doğum günü ərəfəsində Azərbaycan əczaçılıq sənayesinin inkişafına həsr olunmuş tədbirin böyük əhəmiyyətə malik olduğunu bildirib. Azərbaycanda əczaçılığın tarixindən danışan nazir Prezident İlham Əliyevin rəhbərliyi ilə qəbul edilən "Dərman vasitələri haqqında Azərbaycan Respublikasının Qanunu"nun əhəmiyyətini vurğulayıb.

 

Agentliyin İdarə Heyətinin sədri Zaur Əliyev bildirib ki, əczaçılıq sənayesi səhiyyənin inkişafında və əhalinin sağlamlığının qorunmasında əsas strateji tərəfdaşdır. Ölkəmizdə bu sektorun inkişafının ictimai sağlamlıq, tibbi innovasiyalar, xəstəliklərin qarşısının alınması və əhalinin həyat keyfiyyətinin yaxşılaşdırılmasına birbaşa təsir etdiyi vurğulanıb.

 

Tədbir, həmçinin Macarıstanın ölkəmizdəki fövqəladə və səlahiyyətli səfiri Tamaş Yojef Torma, İqtisadiyyat nazirinin birinci müavini Elnur Əliyev, ədliyyə nazirinin müavini Abiddin Hüseynov, Ələt azad iqtisadi zonasının səlahiyyətli qurumunun İdarə Heyətinin sədri Valeh Ələsgərov, Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov və digər qonaqların çıxışı ilə yadda qalıb.