Tənəffüsünüzə dəyər verin – Astma ilə nəzarətdə yaşamaq mümkündür!

Astma — tənəffüs yollarının xroniki iltihabi xəstəliyidir. Bu xəstəlik zamanı bronx divarlarında iltihab, ödem və spazm baş verir ki, bu da nəfəsalmanın çətinləşməsi, xırıltı, öskürək və döş nahiyəsində sıxılma hissi ilə müşayiət olunur. Dünyada milyonlarla insan astmadan əziyyət çəkir, lakin düzgün yanaşma və mütəmadi nəzarət sayəsində bu xəstəliklə tamahəng yaşamaq mümkündür.

Azmedinfo.az astmalı şəxslər üçün zəruri tövsiyələri təqdim edir:

1. Tetikləyici faktorları müəyyən edin və onlardan uzaq durun.
Toz, polen, heyvan tükü, kif göbələkləri, siqaret tüstüsü və bəzi dərman preparatları astma tutmasını tətikləyə bilər. Hər bir xəstə üçün fərdi allergenlər fərqli ola bilər — bu səbəbdən allerqoloji müayinələrdən keçmək vacibdir.

2. Qəfil tutmaların qarşısını almaq üçün dərman müalicəsinə əməl edin.
Astmanın müalicəsi yalnız tutma zamanı deyil, gündəlik profilaktik nəzarətlə mümkün olur. İnhalyator formasında kortikosteroidlər və bronx genişləndirici preparatlar həkimin göstərişi ilə qəbul edilməlidir.

3. Ətraf mühit şəraitini nəzarətdə saxlayın.
Evin havasını tez-tez dəyişmək, tozsoranla təmizlik, allergenlərin qarşısını alan yataq dəstlərindən istifadə və kondisionerlərin filtrini təmiz saxlamaq əhəmiyyətlidir.

4. Sağlam həyat tərzi sürün.
Daimi fiziki aktivlik (məsələn, üzgüçülük), sağlam qidalanma və stresin idarə olunması immunitetin möhkəmlənməsinə və tənəffüs sisteminin daha effektiv işləməsinə kömək edir.

5. Ailənin və yaxınların maarifləndirilməsi vacibdir.
Astmalı şəxsin yanında olan insanlar təcili yardım tədbirlərini, inhalyatorun istifadəsini və astma əlamətlərini tanımağı bilməlidir. Bu, qəfil tutmalar zamanı həyati əhəmiyyət kəsb edə bilər.

Tənəffüs sağlamlığınızı qoruyun – hər nəfəs dəyərlidir.