Xəbər verdiyimiz kimi, bu gün Bakıda Səhiyyə Nazirliyinin və Azərbaycan Cərrahiyyə, Qastroenterologiya və Onkologiya Assosiasiyasının təşkilatçılığı, Azmedinfo.az səhiyyə portalının informasiya dəstəyi ilə “Mədə Xərçənginə Müasir Baxış – hər yönü ilə mədə xərçəngi” mövzusunda elmi-praktiki konfrans keçirilib.

Tədbirin bağlanış mərasimində işçi panellərin moderatorları çıxış edərək diqqətə çatdırıblar ki, konfrans çərçivəsində təqdim edilən məruzələr mulditisiplinar olmaqla yanaşı, dünya tibb elminin, səhiyyə xidmətlərinin müasir çağırışları ilə səsləşir. Bu məruzələr, həmçinin azərbaycanlı alimlərin, onkoloqların, cərrahların, radioloqların və tibbin digər istiqamətlərində çalışan mütəxəssislərimizin mədə xərçənginin müalicəsində qazandıqları mühüm nailiyyətlərin göstəricisidir.

Elmi-praktiki konfransın iştirakçıları sertifikatlarla təltif olunublar.

Xatırladaq ki, “Mədə Xərçənginə Müasir Baxış – hər yönü ilə mədə xərçəngi” adlı elmi-praktiki konfrans Azərbaycan Səhiyyə Nazirliyinin Elmi Tibbi Şurası tərəfindən Davamlı Tibbi Təhsil krediti ilə akkreditasiya olunub.