Bu gün keçirilən “Mədə Xərçənginə Müasir Baxış – hər yönü ilə mədə xərçəngi” adlı elmi-praktik konfrans çərçivəsində mədə xərçəngindən əziyyət çəkən 67 yaşlı qadın pasiyentə icra olunan laparoskopik qastrektomiya əməliyyatı canlı yayımlandı.

Azərbaycan Cərrahiyyə, Qastroenterologiya və Onkologiya Assosiasiyasının sədr müavini, ümumi cərrah Elgün Səmədov tərəfindən icra olunan cərrahi əməliyyatda assistent cərrahlar adıçəkilən Assosiasiyanın üzvləri Emin Bayramov və Zöhrə Abdullazadə oldular.

Təxminən iki saat davam edən laparoskopik qastrektomiya əməliyyatının konfrans iştirakçıları tərəfindən geniş müzakirəsi aparıldı. Həmin praktiki panelin moderatorları Elmir Əsgərov və Edqard Nurməmmədov konfrans iştirakçılarının diqqətinə çatdırdılar ki, mədəsinin kardia hissəsində xərçəng olan xəstə daha öncə Azərbaycan Cərrahiyyə, Qastroenterologiya və Onkologiya Assosiasiyasının sədri onkoloq-həkim Altay Əliyev tərəfindən dörd kurs kimyaterapiya müalicəsi alıb.

Konfrans iştirakçıları üçün canlı yayımlanan cərrahi əməliyyat uğurla yekunlaşdı.