Səhiyyə naziri Teymur Musayevin təşəbbüsü ilə ərsəyə gələn “TürkTransplant” platforması Türk Dövlətləri Təşkilatına (TDT) üzv ölkələrin səhiyyə sistemləri arasında inteqrasiyanı təmin edən mühüm layihədir. Təşəbbüsün əsas məqsədi orqan çatışmazlığından əziyyət çəkən pasientlərə daha tez və effektiv kömək etmək, insan həyatının xilasına töhfə verməkdir.

Azmedinfo.az Orqan Donorluğu və Transplantasiyası üzrə Koordinasiya Mərkəzinin məlumatına əsasən yazır ki, 2023-cü ildə TDT Səhiyyə Nazirlərinin İclasında əldə edilən razılaşmaya əsasən təməli qoyulan bu platformanın yaradılmasına dair Niyyət Protokolu 8 oktyabr 2024-cü il tarixində Şuşa şəhərində keçirilən TDT Səhiyyə Nazirlərinin 4-cü İclasında rəsmən imzalandı. Platforma donor orqan və toxuma çatışmazlığını aradan qaldırmağı hədəfləyir. Türkdilli xalqların genetik yaxınlığı nəzərə alınaraq, layihənin ilk mərhələsi kök hüceyrə transplantasiyası ilə başlamaqdadır.

Yaradılan ortaq məlumat bazası vasitəsilə gözləmə siyahısında olan pasientlərin və potensial donorların qeydiyyatı vahid mərkəzdən izlənilir. Vaxtın kritik önəm kəsb etdiyi təcili hallarda donor-resepiyent uyğunluq testləri sürətləndirilir.

“TürkTransplant” çərçivəsində üzv ölkələrin cərrahları, reanimatoloqları və transplantasiya koordinatorları üçün birgə təlim proqramları təşkil edilir. Təlimlər xüsusilə beyin ölümünün elmi və hüquqi baxımdan düzgün təsbit olunması, donor ailələri ilə psixoloji işin aparılması və əməliyyatların yüksək beynəlxalq standartlarla icrasına yönəlir.

Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzinin İdarə Heyətinin sədri Yeganə Abbasova platformanın bir çox istiqamətlərdə fayda gətirəcəyini qeyd edir:

"TürkTransplant" layihəsi Türk dünyasında tibbi əməkdaşlığı və həmrəyliyi yeni mərhələyə qaldıran strateji addımdır. Beynəlxalq əməkdaşlıq çərçivəsində Niyyət Protokolunun imzalanması yalnız orqan və toxuma mübadiləsini deyil, həm də vahid məlumat bazasının formalaşdırılmasını, genetik uyğunluqların sürətli təyini və kadr hazırlığını təmin edəcək. Bir insanın ölümdən sonra başqa insanlara həyat bəxş etməsi missiyasını qardaş ölkələrlə birgə həyata keçirmək donor çatışmazlığının aradan qaldırılmasına misilsiz töhfə verir.”