Azərbaycan Tibbi İnformasiya və Səhiyyə Portalı
22 Noyabr 2026, Bazar, 19:20
Əlaqə vasitələri
Bizimlə əlaqə
İcbari tibbi sığorta ilə sümük iliyi transplantasiyası 50 pasiyentə icra olunub
21 Noyabr 2026
410
İcbari tibbi sığorta ilə sümük iliyi transplantasiyası 50 pasiyentə icra olunub

Bu il Azərbaycanda 50 pasiyentə dövlət hesabına sümük iliyi transplantasiyası əməliyyatı həyata keçirilib.

Azmedinfo.az xəbər verir ki, bunu Dövlət Tibbi Sığorta və Ekspertiza Agentliyinin İdarə Heyətinin sədri Ramin Rzayev “Dövlət-biznes əməkdaşlıq forumu” çərçivəsində keçirilən “Qurumların fəaliyyəti, işəgötürənlərlə əməkdaşlıq və əmək bazarının aktual məsələləri” mövzusunda panel sessiyada açıqlayıb.

Onun sözlərinə görə, hazırda icbari tibbi sığortanın xidmətlər zərfinə 3318 adda tibbi xidmət daxildir. Bu xidmətlər ilkin səhiyyə xidmətlərini, ailə həkimləri və tibb məntəqələri tərəfindən yerlərdə, eləcə də evlərdə göstərilən tibbi yardımı əhatə edir.

Ramin Rzayev qeyd edib ki, xidmətlər zərfinin əsas məqsədlərindən biri ölkədə ən çox tələb olunan tibbi xidmətlərin icbari tibbi sığorta fondunun maliyyə dəstəyi ilə əhatə olunmasıdır. Bu istiqamət Agentlik tərəfindən strateji hədəf kimi müəyyənləşdirilib.

Agentlik rəhbərinin sözlərinə görə, sümük iliyi transplantasiyası üzrə ilkin olaraq il ərzində 20 pasiyentə xidmət göstərilməsi nəzərdə tutulsa da, bu il həmin göstərici 50-yə çatdırılıb.

O bildirib ki, sümük iliyi transplantasiyası yüksək maliyyə resursları tələb edən tibbi xidmətlərdəndir. Buna baxmayaraq, xidmətin əhatə dairəsi genişləndirilib və il ərzində 50 pasiyent icbari tibbi sığorta hesabına bu tibbi xidmətdən yararlanıb.

Ramin Rzayev, həmçinin özəl tibb müəssisələrinin Agentliyin xidmətlərindən yararlanması və tibbi xidmətlərin göstərilməsi sisteminə qoşulması ilə bağlı müraciətlərin artıq elektron formatda qəbul ediləcəyini bildirib.

Qeyd edib ki, bundan sonra müqavilə prosedurları üçün hər hansı mərkəzə şəxsən müraciət etməyə və sənədləri fiziki formada təqdim etməyə ehtiyac olmayacaq. Müraciətlər elektron qaydada qəbul edilərək operativ şəkildə qiymətləndiriləcək, müəssisənin xidmət göstərmək üçün uyğunluğu barədə qərar veriləcək və nəticə ilə bağlı bildiriş müvafiq müəssisəyə sistem vasitəsilə göndəriləcək.

Ən çox oxunanlar