Azərbaycan Tibbi İnformasiya və Səhiyyə Portalı
22 Noyabr 2026, Bazar, 19:12
Əlaqə vasitələri
Bizimlə əlaqə
Antibiotiklərdən düzgün istifadə həyati əhəmiyyət daşıyır
19 Noyabr 2026
658
Antibiotiklərdən düzgün istifadə həyati əhəmiyyət daşıyır

18–24 noyabr Antibiotiklərdən İstifadə ilə bağlı Maarifləndirmə Həftəsi

Antibiotiklər 1940-cı illərdən bəri milyonlarla insanın həyatını xilas edib və orta ömür müddətinin artmasına töhfə verib. Lakin bu dərmanların həddindən artıq və düzgün olmayan istifadəsi bakteriyaların antibiotiklərə qarşı davamlılığının yaranmasına səbəb olub.

Azmedinfo.az xəbər verir ki, antibiotikə davamlı bakteriyalar artıq mövcud dərmanlarla müalicəyə tabe olmur. Mütəxəssislərin diqqətə çatdırdığına görə, dünyada hər il təxminən 700 min insan antibiotiklərə davamlı infeksiyalar səbəbindən həyatını itirir. Bu problem həm də səhiyyə xərclərinin artmasına və müalicə imkanlarının məhdudlaşmasına gətirib çıxarır.

Mütəxəssislər vurğulayırlar ki, kəskin infeksiyaların, xüsusilə tənəffüs yolu infeksiyalarının 80–90 faizi virus mənşəlidir. Antibiotiklər viruslara təsir göstərmir, qızdırmasalıcı deyil və immun sistemini gücləndirmir. Əksinə, orqanizmdəki faydalı bakteriyalara da zərər verə bilər. Buna görə antibiotiklər yalnız həkim təyinatı ilə istifadə edilməlidir.

Antibiotiklərə davamlılığın artması gələcəkdə infeksiyaların müalicəsini ciddi şəkildə çətinləşdirə, orqan transplantasiyası, onkoloji əməliyyatlar və kimyaterapiya kimi həyati əhəmiyyətli tibbi müdaxilələrin riskini yüksəldə bilər.

Mütəxəssislərin əsas çağırışı aydındır: antibiotiklərdən yalnız zəruri hallarda, düzgün dozada və həkimin müəyyən etdiyi müddətdə istifadə edilməlidir. Bu, həm fərdi sağlamlığın, həm də cəmiyyətin gələcəkdə effektiv müalicə imkanlarının qorunması üçün vacibdir.

Ən çox oxunanlar