Azərbaycanın Şanxay Əməkdaşlıq Təşkilatı (ŞƏT) ilə münasibətlərində səhiyyə, elm və təhsil sahələrində əməkdaşlıq üçün yeni imkanların yarana biləcəyi bildirilir.

Azmedinfo.az xəbər verir ki, Azərbaycan-ŞƏT əməkdaşlığının perspektivlərinə həsr olunmuş analitik təhlildə təşkilatın fəaliyyətinin yalnız siyasi və təhlükəsizlik məsələləri ilə məhdudlaşmadığı, humanitar sahələrin də tərəfdaşlığın mühüm istiqamətlərindən olduğu qeyd edilir.

ŞƏT-in 2035-ci ilədək İnkişaf Strategiyasında təhlükəsizlik və iqtisadi əməkdaşlıqla yanaşı, elm və texnologiya, səhiyyə, ətraf mühit və təhsil sahələrində əlaqələrin inkişafı prioritet istiqamətlər sırasında yer alır. Bu isə təşkilat çərçivəsində üzv və tərəfdaş ölkələr arasında səhiyyə sahəsində əməkdaşlığın genişləndirilməsi üçün institusional zəmin yaradır.

Azərbaycanın ŞƏT ilə əlaqələri də yalnız siyasi və iqtisadi istiqamətlərlə məhdudlaşmır. Təhlildə qeyd olunur ki, ölkəmizin təşkilatla əməkdaşlığı digər sahələrlə yanaşı, elm, səhiyyə, turizm, sivilizasiyalararası dialoq, multikulturalizm və tolerantlıq kimi sahələri də əhatə edir.

Səhiyyə əməkdaşlığı üçün potensial

ŞƏT-in geniş coğrafiyası və böyük əhali resursu səhiyyə sahəsində əməkdaşlıq üçün də əhəmiyyətli potensial formalaşdırır. Təşkilata Çin, Hindistan, Rusiya, İran, Pakistan və Mərkəzi Asiya ölkələri kimi böyük əhali və səhiyyə sistemlərinə malik dövlətlər daxildir. Məqalədə təşkilatın ümumilikdə 3,4 milyard nəfərdən çox əhalini əhatə etdiyi bildirilir.

Bu miqyas səhiyyə sahəsində təcrübə mübadiləsi, elmi əməkdaşlıq, tibbi texnologiyaların inkişafı və səhiyyə sistemləri arasında əlaqələrin genişləndirilməsi baxımından əhəmiyyətli imkanlar yarada bilər.

Azərbaycan üçün isə ŞƏT ölkələri ilə səhiyyə əməkdaşlığının genişləndirilməsi elm və texnologiya istiqamətləri ilə paralel inkişaf etdirilə biləcək sahələrdən biri kimi nəzərdən keçirilə bilər. Xüsusilə tibbi elmi tədqiqatlar, innovativ texnologiyalar və səhiyyənin rəqəmsallaşdırılması kimi istiqamətlər bu əməkdaşlığın potensial sahələri sırasında yer ala bilər.

Azərbaycan-ŞƏT münasibətlərinin gələcəyi yalnız formal siyasi əməkdaşlığın genişləndirilməsi ilə deyil, müxtəlif sahələrdə praktiki tərəfdaşlıq imkanlarının reallaşdırılması ilə də bağlıdır.

Beləliklə, ŞƏT-in genişlənən gündəliyində səhiyyənin ayrıca prioritet kimi müəyyənləşdirilməsi Azərbaycanın təşkilatla humanitar əməkdaşlığının inkişafı baxımından diqqətçəkən istiqamətlərdən biri kimi qiymətləndirilə bilər.