Yeni innovativ inkişaf strategiyası “Cəmiyyət 5.0” müasir cəmiyyətin üzləşdiyi aktual problemlərin həlli məqsədi ilə hazırlanmış və Birləşmiş Millətlər Təşkilatının 17 Dayanıqlı İnkişaf Məqsədlərinə uyğun olan social,ekoloji və iqtisadi tərəqqinin universal modeli kimi pozisiyalandırılmışdır. Bu konsepsiya insan, təbiət və texnologiyanın simbiozuna nail olmaqla yeni dəyərlərin yaradılmasını təşviq edir.

İqtisadiyyatın və cəmiyyətin təkamülünün müasir tendensiyaları – qloballaşma, urbanizasiya, rəqəmsallaşma, artan beynəlxalq rəqabət, eləcə də texnogen, sosial və ekoloji problemlər bu çağırışlara cavab tapmaq zərurətini müəyyənləşdirir.

Azmedinfo.az xəbər verir ki, bu barədə Azərbaycan Cərrahiyyə, Qastroenterologiya və Onkologiya Cəmiyyətinin katibi, Akademik Mustafa Topçubaşov adına Elmi Cərrahiyyə Mərkəzinin şöbə müdiri Günel Məmmədovanın "Cəmiyyət 5.0-da tibbi turizmin inkişaf etdirilməsi üçün “Səhiyyə 4.0” konsepsiyasının əhəmiyyəti" mövzusunda məqaləsində bəhs edilib. Məqaləni təqdim edirik:

Heç kəsə sirr deyil ki, sağlamlıq insanın aktiv həyatı və normal yaşaması üçün vacib amildir. Cəmiyyətin əmək, sosial, intellektual və demoqrafik potensialının inkişafı da səhiyyənin vəziyyətindən asılıdır. Bu baxımdan, hər bir insan üçün xoşbəxt ömür sürməyin açarı sağlamlığının qeydinə qalmaqdır.

Sanatoriya-kurort turizmi tibb, iqtisadiyyat, tarix, sosiologiya, coğrafiya və bir sıra digər elmlərə təsir edən mürəkkəb və çoxşaxəli turizmin çox vacib bir hissəsidir.

Müşahidələr onu deməyə əsas verir ki, müasir dövrdə tibbi turizm gen keçdikcə daha geniş areala yayılır, daha çox insana xidmət göstərir. Belə ki, bir çox xəstəliklər üçün kəskin dövrlərdə remissiya prosesi davam edərkən, medikamentoz müalicə olmadan ən təsirli və geniş tətbiq edilən sanatoriya-kurort müalicəsi kompleksidir. Kurortda bütün müalicəvi və profilaktik tədbirlər xəstəlik və insan orqanizminin həyat tonusunun və dözümlülüyünün xüsusiyyətləri nəzərə alınmaqla kompleks terapiyada aparılır.

Bu gün sanatoriya-kurort xidmətləri bazarında sanatoriyanın uğuru sağlamlıq və ya terapevtik effektivlik və xərclərin minimuma endirilməsi sayəsində yüksək mənfəət təmin edən texnologiyalara əsaslanan innovativ layihələrlə müəyyən edilir. İnnovasiya elmi nailiyyətlərdən, qabaqcıl təcrübələrdən istifadəyə əsaslanan, sistemin səmərəliliyinin və xidmətlərin keyfiyyətinin yüksəldilməsini təmin edən texnika, texnologiya, işin təşkili və ya idarə edilməsi sahəsində yeni inkişafdır. Bir sıra ölkələr rəqəmsallaşmaya əsaslanan uzunmüddətli inkişaf strategiyaları qəbul edirlər.

 Səhiyyə 4.0 konsepsiyası

Elmi ədəbiyyatda, qlobal mediada “Sağlamlıq 4.0”, “Səhiyyə 4.0” günbəgün daha geniş vüsətlə yayılır. Onlar özlərində tibbin rəqəmsallaşdırılmasının inkişafını nümayiş etdirməklə yanaşı, IV Sənaye İnqilabının çağırışları fonunda virtuallaşdırmanın və tibbi məlumatların emalının innovativ imkanlarının həyata keçirilməsi yollarını təklif edirlər.

Səhiyyə 4.0 konsepsiyası Sənaye 4.0 konsepsiyasını tibbi informasiya sistemlərindən və böyük verilənlərdən istifadə edən səhiyyə təşkilatlarının inkişafı baxımından genişləndirir. Böyük miqdarda məlumat mübadiləsinə əsaslanan xəstə mərkəzli sistem səhiyyə xidmətinin yaxşılaşdırılmasına səbəb ola bilər. Yenilik səhiyyə təşkilatını xəstəyə aktiv subyekt kimi fərdiləşdirilmiş xidmətlər göstərə bilən inteqrasiya olunmuş mərkəzə çevirməkdir.

Araşdırılmaya cəlb edilən tədqiqat və inkişaf sahələrinə bioinformatika, səhiyyənin informasiyalaşdırılması, kiber-fiziki sistemlər, Əşyaların İnterneti, süni intellekt, robototexnika, bulud hesablamaları və informasiya təhlükəsizliyi daxildir. Bundan əlavə, Səhiyyə 4.0 konsepsiyası xəstənin ətraf mühiti, genetikası və həyat tərzi haqqında məlumat və biliyə əsaslanan effektiv müalicə yanaşmalarını müəyyən etmək məqsədi daşıyan dəqiq fərdiləşdirilmiş tibblə sıx bağlıdır.

“Keyfiyyət 4.0” konsepsiyasının tibbi turizmə töhfələri

“Keyfiyyət 4.0” strategiyası rəqəmsal əsrdə tədris, planlaşdırma və fəaliyyət zamanı nəzərə alınmalı olan on bir sahəni əhatə edir: verilənlər, analitika, qarşılıqlı əlaqə, əməkdaşlıq, proqram inkişafı, miqyaslılıq, idarəetmə sistemləri, uyğunluq, mədəniyyət, liderlik, səriştə.

Bu gün bir çox ölkədə fəaliyyət göstərən sanatoriya-kurort müəssisələrinin vəziyyəti onu deməyə əsas verir ki, tibbi turizm sahəsində innovative yeniliklərə nail olmaq məqsədilə “Keyfiyyət 4.0”ın imkanlarından tam istifadə etməzdən əvvəl ilk növbədə keyfiyyətə standart yanaşmalar tətbiq etməlidirlər.

Tibb müəssisələrinin, xüsusilə sanatoriya-kurort xidmətində fəaliyyət göstərən müəssisələrin innovativ inkişafı üçün təkcə rəqəmsallaşmanın imkanlarını və keyfiyyətin idarə edilməsinə yeni informasiya texnologiyalarının tətbiqini deyil, həm də Dördüncü Sənaye İnqilabının özünün təsirini və rəqəmsallaşmanın müxtəlif aspektlərinin keyfiyyətin idarə edilməsinə yanaşmalara təzahürünü nəzərə almaq lazımdır.

Öz fəaliyyətini elmin və texnologiyanın yeniliklərinə söykəməyə çalışan sanatoriya-kurort müəssisələri rəqəmsal texnologiyalar tətbiq etməklə vətəndaşların yeni ehtiyaclarını və gözləntilərini ilkin mərhələdə müəyyənləşdirməyə və həyata keçirməyə çalışır. Sanatoriya mütəxəssisləri informasiyalaşdırma və rəqəmsallaşma, “Cəmiyyət 5.0”ın inkişafı ilə bağlı xəbərləri diqqətlə izləyir və “Keyfiyyət 4.0” strategiyasının bütün istiqamətləri üzrə fəaliyyətin təkmilləşdirilməsi yollarını hazırlayır: verilənlərdən istifadə, analitika, qarşılıqlı əlaqə, əməkdaşlıq, tətbiqlərin inkişafı, miqyaslılıq, idarəetmə sistemləri, uyğunluq, mədəniyyət, liderlik, səriştə və s.