Azərbaycan oftalmoloji elminin banilərindən olan akademik Zərifə Əliyeva, akademik Larisa Moşetova və professor Nina Şulpinanın müəllifi olduqları “Oftalmologiyanın aktual problemləri” adlı monoqrafiya ilk dəfə olaraq ingilis dilinə yüksək səviyyədə tərcümə edilərək yenidən nəşr edilib. Əsər AMEA-nın “Elm” nəşriyyatında yeni redaktədə çap olunub.

Azmedinfo.az xəbər verir ki, nəşrin hazırlanması və elmi redaktəsi akademik İradə Hüseynova və AMEA-nın müxbir üzvü, Zərifə Əliyeva adına Milli Oftalmologiya Mərkəzinin direktoru Elmar Qasımovun rəhbərliyi ilə həyata keçirilib.

Monoqrafiyanın yenidən nəşri Prezident İlham Əliyevin 2022-ci il 3 noyabr tarixli “Akademik Zərifə Əliyevanın 100 illik yubileyinin qeyd edilməsi haqqında” Sərəncamına əsasən, AMEA Rəyasət Heyətinin 22 noyabr 2022-ci il tarixli qərarı çərçivəsində həyata keçirilib. Kitaba ön söz AMEA prezidenti akademik İsa Həbibbəyli və əsərin müəlliflərindən biri – Rusiya Fasiləsiz Peşəkar Təhsil Tibb Akademiyasının prezidenti, akademik Larisa Moşetova tərəfindən yazılıb.

Beş əsas bölmədən ibarət olan elmi əsər oftalmologiya sahəsində aktual mövzuları – həkim etikasından göz virologiyasına, biomikroskopiyanın müasir aspektlərindən mikrocərrahiyyənin əsaslarına qədər geniş spektri əhatə edir. Əsər həm nəzəri bilikləri, həm də müəlliflərin praktik təcrübəyə əsaslanan elmi nəticələrini ehtiva edir.

İngilis dilinə tərcümə olunmuş bu monoqrafiya oftalmoloqlar, ixtisasartırma üzrə müəllim heyəti, tibb fakültələrinin ingilisdilli tələbələri və sahə mütəxəssisləri üçün əvəzolunmaz elmi vəsait hesab olunur.