Son günlər uşaqlarda müşahidə olunan bəzi simptomlara aydınlıq gətirən Səhiyyə Nazirliyi, ictimaiyyətdə yaranan narahatlıqla bağlı rəsmi mövqeyini açıqlayıb.

Azmedinfo.az xəbər verir ki, nazirliyin aidiyyəti qurumları tərəfindən verilən məlumata əsasən, hazırda ölkə ərazisində yoluxucu xəstəliklərə görə tibb müəssisələrinə edilən müraciətlərdə əhəmiyyətli artım müşahidə olunmur.

Bildirilib ki, uşaqlarda rast gəlinən hallar əsasən yüngül əlamətlərlə müşayiət olunur və bu hallar qısa müddətdə tam sağalma ilə nəticələnir.

Nazirlik qeyd edir ki, epidemioloji vəziyyət davamlı olaraq nəzarətdə saxlanılır, Dövlət Sanitariya Nəzarəti Xidmətinin müvafiq qurumları tərəfindən zəruri profilaktik tədbirlər həyata keçirilir.

Eyni zamanda valideynlərə önləyici davranışlara diqqət etmələri tövsiyə olunur:

Uşaqların şəxsi gigiyenası,

Düzgün və balanslı qidalanma,

Günəşin altında uzun müddət qalmamaq,

Həmçinin immun sistemini dəstəkləyən sağlam həyat rejiminə riayət olunması vacibdir.

Qeyd edək ki, son vaxtlar uşaqlar arasında yüksək hərarət, halsızlıq və iştahasızlıq kimi simptomlar müşahidə olunur, lakin bu hallar ümumilikdə ciddi narahatlıq doğuracaq səviyyədə deyil.