Açıq ürək əməliyyatlarında istifadə üçün Türkiyə Sağlamlıq İnstitutları Başkanlığı (TÜSEB) və ASELSAN tərəfindən birgə hazırlanmış yerli ürək-ağciyər aparatının Ankara Bilkənt Şəhər Xəstəxanasında keçirilən ilk qan testləri uğurla nəticələnib.

Azmedinfo.az "TRT Haber"ə istinadən yazır ki, TÜSEB-in rəhbəri professor Ümit Kervanın bildirdiyinə görə, layihə çərçivəsində ASELSAN və Bilkənt Şəhər Xəstəxanası yaxından əməkdaşlıq ediblər. İlk laboratoriya testləri xəstəxananın ürək-damar cərrahiyyəsi bölməsində aparılıb. ASELSAN mühəndisləri təxminən iki həftə xəstəxanada fəaliyyət göstərərək yerli komandalarla birlikdə sınaqları həyata keçiriblər.

Professorun sözlərinə görə, qan testlərinin uğurlu nəticələrindən sonra növbəti mərhələ olan heyvan üzərində testlər də müsbət nəticə verib. İndi klinik sınaqlara başlanması planlaşdırılır. Onun bildirdiyinə görə, bu cihaz olmadan açıq ürək əməliyyatları mümkün deyil və cihazın 90%-dən çox hissəsi yerli mühəndislər tərəfindən hazırlanıb. Klinik sınaqların bu payız başlanması, 2026-cı ilin əvvəlində isə tamamlanması nəzərdə tutulur.

Yüksək standartlı cihaz, beynəlxalq bazarda yerini tuta bilər

Türkiyədə hər il təxminən 85 min açıq ürək əməliyyatı aparılır və bunun yarısı koronar bypass üsulu ilə həyata keçirilir. Professor qeyd edib ki, əvvəllər yalnız böyük şəhərlərdə edilən bu əməliyyatlar artıq ölkənin əksər bölgələrində də uğurla aparılır.

Hazırda dünyada ürək-ağciyər aparatı istehsal edən cəmi 3 şirkət var və bazarın böyük hissəsini yalnız iki firma tutur. Yüksək standartlara cavab verən yerli cihaz beynəlxalq səviyyədə də rəqabət apara biləcək. O, Bilkənt və Etlik Şəhər Xəstəxanalarında qurulan texnologiya transfer ofislərinin bu prosesə böyük töhfə verdiyini bildirib.

Yerli istehsal xarici asılılığı azaldacaq

Ankara Bilkənt Şəhər Xəstəxanasının Baş həkimi professor Levent Öztürk isə qeyd edib ki, 4 min 50 çarpayı və 130 əməliyyatxana ilə bu xəstəxana təkcə Türkiyənin deyil, Avropanın da ən böyük tibb müəssisələrindəndir. O bildirib ki, pandemiya dövründə ventilator çatışmazlığına qarşı yerli istehsalın böyük əhəmiyyəti oldu və bu təcrübə digər cihazlara da tətbiq olunmalıdır.

L.Öztürkün sözlərinə görə, yerli tibbi cihazların istehsalı valyutanın xaricə axınının qarşısını alacaq, ölkə daxilində elmi-tədqiqat işlərini təşviq edəcək və xarici asılılığı azaldacaq. O, Bilkənt Şəhər Xəstəxanasının həm də elmi-tədqiqat və tədris mərkəzi olaraq bu istiqamətdə üzərinə düşən bütün vəzifələri yerinə yetirməyə hazır olduğunu vurğulayıb.

Digər innovativ layihələr də gündəmdədir

TÜSEB rəhbəri əlavə edib ki, artıq glükozun izlənməsi üçün cihaz hazırlanıb və klinik sınaqların son mərhələsinə keçilib. Gələcəkdə ultrasəs və hemodializ cihazlarının da yerli imkanlarla hazırlanması planlaşdırılır. Bu layihələr də yaxın zamanda ictimaiyyətə təqdim ediləcək.