Günəş keçmiş 11 illik dövrdə yüzillik dövrlər üzrə minimum nöqtəni geridə qoyub və hazırkı dövr daha aktivdir.

Azmedinfo.az RİA Novosti-yə istinadən yazır ki, Rusiya Elmlər Akademiyasının Kosmik Tədqiqatlar İnstitutunun Günəş astronomiyası laboratoriyasının rəhbəri Sergey Boqaçovun sözlərinə görə, növbəti bir neçə dövr də daha güclü ola bilər. O, RİA Novosti agentliyinə verdiyi müsahibədə bildirib ki, hazırda Günəşin aktivliyi 11 illik dövrün zirvəsindən sonra azalma mərhələsinə keçir. Parıltıların sayı ötən illə müqayisədə əhəmiyyətli dərəcədə azalıb, səthdə isə daha çox koronallı dəliklər müşahidə olunur – bu da aktivliyin enməsinə işarədir.

“Əgər qarşıdakı 20-30 illə bağlı proqnosumu soruşursunuzsa, düşünürəm ki, biz indi ciddi artım mərhələsindəyik və hər yeni dövr əvvəlkindən daha güclü olacaq. Amma, əlbəttə, təbiət gözlənilməzdir – hər şey tam əksi də ola bilər”, – deyə o qeyd edib.

Alim əlavə edib ki, 11 illik dövrlərlə yanaşı, yüzillik, hətta daha uzunmüddətli Günəş dövrləri də mövcuddur. Lakin bu uzunmüddətli dəyişikliklərin təbiəti hələ də tam öyrənilməyib və onların inkişaf qanunauyğunluğu elm üçün müəmmalı qalır.