Saratov Dövlət Tibb Universitetinin (Saratov DTU) alimləri müəyyən ediblər ki, torpaq bakteriyaları tərəfindən sintez olunan gümüş nanozərrəcikləri xəstəxana şəraitində geniş yayılmış və təhlükəli olan "Pseudomonas aeruginosa" infeksiyasını effektiv şəkildə məhv edə bilər.

Azmedinfo.az "Ecopravda" nəşrinə istinadən yazır ki, bu bakteriya əksər antibiotiklərə davamlıdır və xüsusən immun sistemi zəif olan, reanimasiya, yanıq və travmatologiya şöbələrində yerləşdirilən xəstələr üçün çox təhlükəlidir. Saratov DTU-nun məlumatına əsasən, son 20 ildə bu patogen xəstəxanadaxili infeksiyaların əsas səbəblərindən birinə çevrilib.

Alimlər müəyyən ediblər ki, Azospirillum brasilense bakteriyası 6–35 nanometr ölçülü gümüş nanozərrəcikləri istehsal edə bilir. Bu bioloji sintez üsulu ənənəvi metodlardan fərqli olaraq toksik maddələrdən istifadə etmir və bu səbəbdən insan və ətraf mühit üçün daha təhlükəsiz sayılır.