“Təmiz ölkəm” devizi altında həyata keçirilən ümumrespublika təmizlik aksiyaları bu dəfə də geniş coğrafiyanı əhatə edib. Ötən həftə Ekologiya və Təbii Sərvətlər Nazirliyinin yerli qurumlarının təşəbbüsü, yerli icra hakimiyyəti orqanlarının, bələdiyyə nümayəndələrinin və əhali nümayəndələrinin fəal iştirakı ilə ölkənin müxtəlif bölgələrində ətraf mühitin mühafizəsi məqsədilə təmizlik tədbirləri həyata keçirilib.

Azmedinfo.az Ekologiya və Təbii Sərvətlər Nazirliyinin ictimai maarifləndirmə və cəmiyyətin ekoloji məsuliyyətini artırmağa xidmət missiyasına dəstək olur.

Aksiyalar çərçivəsində Xəzər dənizinin Novxanı və Sumqayıt sahilləri, Lənkərançayın Lənkəran hissəsi, Tovuz çayın Tovuz, Tərtərçayın Tərtər, Həkəri çayın Zəngilan rayonundan keçən sahələri, Quba - Qəçrəş və Göygöl - Toğanalı avtomobil yollarının kənarları, eləcə də İmişli şəhərinin Zəfər prospekti, Mingəçevir şəhərinin Sahil ərazisi, Şəki şəhərinin Salman Mümtaz küçəsi, Quba rayonunun Quba meşəbəyliyi və Qəbələ rayonunun Vəndam meşəbəyliyində təmizlik işləri aparılıb.

Yerli əhalinin, könüllülərin və dövlət qurumlarının birgə əməkdaşlığı ilə keçirilən bu aksiyalar nəticəsində ümumilikdə 4,5 tondan artıq məişət və müxtəlif növ tullantılar ətraf mühitdən yığışdırılaraq aidiyyəti üzrə utilizasiya olunub.

Tədbirin əsas məqsədi ətraf mühitin qorunması, tullantıların düzgün idarə olunması mədəniyyətinin təbliği və vətəndaşların bu istiqamətdə maarifləndirilməsidir. Eyni zamanda bu cür aksiyalar insanların təbiətə qarşı daha məsuliyyətli münasibət göstərməsinə, ictimai həmrəyliyin güclənməsinə və ekoloji düşüncənin formalaşmasına töhfə verir.

Qeyd edək ki, “Təmiz ölkəm” təşəbbüsü çərçivəsində mütəmadi olaraq müxtəlif bölgələrdə analoji təmizlik aksiyalarının keçirilməsi planlaşdırılır. Bu fəaliyyətlər həm təbiətin mühafizəsinə, həm də cəmiyyətin ekoloji dəyərlərə sahib çıxmasına xidmət edir.