Yay mövsümündə havaların həddindən artıq isti keçməsi insanlarda tər ifrazını artırır və bunun nəticəsində bədəndən əhəmiyyətli dərəcədə maye itirilir. Bu zaman susuzluğun yaranması labüddür və itirilmiş maye mütləq şəkildə bərpa olunmalıdır.

Azmedinfo.az xəbər verir ki, Bakı Baş Səhiyyə Mərkəzinin məlumatına əsasən, susuzluğun qarşısını almaq üçün ən uyğun içki adi sudur, eləcə də meyvələrin tərkibindəki təbii şirələr bu baxımdan faydalı və əvəzolunmaz hesab olunur. Lakin diqqət yetirilməli vacib məqamlardan biri də istifadə edilən suyun temperaturudur.

Bildirilib ki, çox soyuq və buz kimi içkilərin qəbulu sağlamlığa zərərlidir. Belə içkilər boğaz ağrısı, mədə-bağırsaq sistemi pozğunluqları kimi bir sıra fəsadlara səbəb ola bilər. Eyni zamanda, soyuq içkilər susuzluğu qısa müddətli yatırır, lakin bədənə uzunmüddətli rahatlıq gətirmir.

Bakı Baş Səhiyyə Mərkəzi vətəndaşlara tövsiyə edir ki, isti havalarda, xüsusilə günəş şüaları altında olduqda və ya isti yerdən soyumağa keçərkən, qəbul etdikləri mayelərin temperaturuna diqqət yetirsinlər. Otaq temperaturunda su və təbii içkilər sağlamlıq üçün daha əlverişlidir.