Dəniz sahilində yaşamaq insan ömrünü uzada bilər, lakin bu effekt göl və ya çay kənarında yaşamaq üçün keçərli deyil. Bu qənaətə ABŞ alimləri 66 min bölgə üzrə məlumatları təhlil edərək gəliblər.

Azmedinfo.az xəbər verir, Tədqiqat Environmental Research jurnalında dərc olunub.

Tədqiqatçılar su hövzələrinə yaxınlığın orta ömür uzunluğuna təsirini araşdırıblar. Onlar iqlim, gəlir səviyyəsi, nəqliyyat, hava keyfiyyəti və urbanizasiya dərəcəsini nəzərə alıblar. Nəticələr göstərib ki, okean və körfəz sahillərində yaşayan insanlar materikin iç hissəsində yaşayanlara nisbətən orta hesabla 1 il daha uzun ömür sürürlər.

Bunun əksinə olaraq, şəhərlərdə yerləşən göl və çay kənarlarında yaşamaq daha qısa ömürlə əlaqələndirilir. Bu fərq ekoloji və sosial amillərlə izah olunur. Sahil əraziləri daha mülayim iqlim, təmiz hava, istirahət zonaları və yüksək gəlir səviyyəsi ilə fərqlənir. Lakin daxili su hövzələri ətrafındakı şəhər əraziləri çirklənmə, sıxlıq və sosial bərabərsizlikdən əziyyət çəkə bilər.

Müəlliflər qeyd edirlər ki, şəhərsalma zamanı yalnız təbii obyektlərin mövcudluğu deyil, onların sosial və ekoloji mühitə necə uyğunlaşdırıldığı da nəzərə alınmalıdır. Sadəcə suya yaxınlıq yetərli deyil — kontekst önəmlidir.