Şimali Qafqaz Federal Universitetinin (ŞQFU) mütəxəssisləri sahə şəraitində istifadəyə uyğun, sadə və iqtisadi səmərəli su təmizləmə və dezinfeksiya üsulu hazırlayıblar.

Azmedinfo.az "Planet today" nəşrinə istinadən yazır ki, yeni texnologiya suyun sərtliyini azaldır, bakteriya və göbələkləri məhv edir, həmçinin onların təkrar yaranmasının qarşısını alır. Araşdırmanın nəticələri artıq Rusiyada patentləşdirilib.

Alimlərin sözlərinə görə, ənənəvi su təmizləmə sistemləri adətən gümüş və mis nano-hissəcikləri ilə bahalı bakterisid filtrlər tələb edir. Bu filtrlər tez çirklənir, daim texniki qulluq və yüksək xərc tələb edir.

Yeni metod neytral yarımkeçirən membranla (məsələn, brezenti xatırladan materialdan) təchiz olunmuş elektrodializator vasitəsilə suyun keçirilməsinə əsaslanır. Elektrokimyəvi reaksiya nəticəsində natrium hipoxlorit əmələ gəlir, bu maddə suyu dezinfeksiya edir, elektrik sahəsi isə mikroorqanizmləri məhv edir. Eyni zamanda sudan kalsium və maqnezium ionları çıxarılır.

Su daha sonra mərmər və ya dolomit qırıntısından keçirilərək acı-duzlu dadı yumşaq və bir qədər şirin bir dada çevirilir. Texnologiya yalnız sahə şəraiti üçün deyil, fərdi evlər və kiçik yaşayış məntəqələri üçün də yararlıdır.

Bu üsulla suyun təmizlənməsi üçün enerji sərfi cəmi 1,2 kVt·saat / m³ təşkil edir. Qurğu elektrik şəbəkəsi, avtomobil akkumulyatoru və ya günəş panelləri ilə işləyə bilər.