“Disbakterioz dedikdə bağırsaq mikroflorasında tarazlığın pozulması başa düşülür. Normalda insanın bağırsağında həm faydalı, həm də şərti-patogen bakteriyalar ahəngdar şəkildə mövcuddur. Bu mikroorqanizmlər həzm prosesində, immun sisteminin gücləndirilməsində və bəzi vacib vitaminlərin sintezində mühüm rol oynayır.

Azmedinfo.az xəbər verir ki, bu sözləri qastroenteroloq-hepatoloq, invaziv endoskopist Dr. Aqil Ağakişiyev bildirib.

Həkim qeyd edib ki, uzunmüddətli antibiotik istifadəsi, düzgün olmayan qidalanma, xroniki stres və digər xarici amillər bu həssas balansı poza bilər. Nəticədə disbakterioz adlandırılan vəziyyət yaranır.

"Bu halın əsas əlamətləri arasında köp, qaz, qəbizlik və ya ishal kimi həzm pozğunluqları, iştahanın azalması və ümumi halsızlıq müşahidə olunur. Əgər bu simptomlar sizdə də varsa, vaxtında müayinədən keçməyiniz vacibdir", - deyə ekspert vurğulayıb.

O, əlavə edib ki, disbakterioz zamanı faydalı bakteriyaların sayı azalır və bu, immun sisteminin zəifləməsinə səbəb olur. Nəticədə orqanizm müxtəlif infeksiyalara qarşı daha həssas və müdafiəsiz hala gəlir.