Xəzərin Şüvəlan sahili yarım tona yaxın tullantıdan təmizlənib

01 Avqust 2025

412

Ətraf mühitin mühafizəsinə töhfə vermək, cəmiyyətdə ekoloji məsuliyyəti artırmaq və ictimai iştirakçılığı təşviq etmək məqsədilə Ekologiya və Təbii Sərvətlər Nazirliyinin təşkilatçılığı ilə keçirilən "Təmiz ölkəm" təmizlik aksiyası növbəti dəfə Xəzər dənizinin Şüvəlan sahilində təşkil olunub.

Azmedinfo.az Ekologiya və Təbii Sərvətlər Nazirliyinin ictimai maarifləndirmə və cəmiyyətin ekoloji məsuliyyətini artırmağa xidmət missiyasına dəstək olur.

Nazirliyin əməkdaşlarının, Eko-Dayvinq Gənclər Mərkəzinin nümayəndələrinin və könüllülərin iştirak etdiyi aksiya zamanı iştirakçılar ümumilikdə 450 kiloqramdan artıq tullantını sahil zolağından təmizləyib.

Qeyd edək ki, ekoloji şüurun artırılmasına yönəlmiş təmizlik aksiyaları mövsüm boyu Bakıda və regionlarda hər həftə davam etdiriləcək.

Eko-Dayvinq Gənclər Mərkəzinin rəhbəri Bəşir Cabbarov bildirib ki, mərkəzin Ekologiya və Təbii Sərvətlər Nazirliyi və Xəzər Rayon İcra Hakimiyyətinin dəstəyi ilə icra etdiyi “Xəzərin Nəfəsi” eko layihə yalnız tullantıların toplanması ilə məhdudlaşmır, eyni zamanda gənclərdə peşəkar dayver və ekoloqlar tərəfindən maarifləndirici seminar və nümayişlər təşkil olunur.