Yeni Klinikanın direktoru Barat Yusubov insanlıq adına dərin mənəvi anlam daşıyan, çoxlarının hələ tərəddüd etdiyi bir qərar verib – bütün orqanlarını könüllü olaraq bağışlayıb. O, bu gün həyatında bəlkə də ən önəmli və mənəvi dəyəri ən yüksək olan qərarı verdiyini bildirib – bütün orqanlarını bağışlayıb.

Azmedinfo.az olaraq biz də bu nəcib və ali niyyətli qərara böyük rəğbətlə yanaşır, cəmiyyətin bütün üzvlərini belə humanist təşəbbüslərə dəstək verməyə çağırırıq.

Barat Yusubov bu addımı ilə təkcə həkim kimi deyil, həm də bir insan, bir vətəndaş, bir vicdan sahibi kimi nə qədər böyük ürəyə sahib olduğunu ortaya qoyub: “Bu gün bəlkə də həyatımın ən önəmli qərarını verdim – bütün orqanlarımı bağışladım. İnanılmaz dərəcədə sevincliyəm, çünki ölümüm belə kimlərəsə həyat bəxş edəcək,” – deyə o, öz şəxsi sosial media hesabında paylaşım edib.

Bu addım bir daha göstərir ki, orqan donorluğu – sadəcə tibbi deyil, həm də insani dəyər məsələsidir. Barat Yusubovun bu qərarı həyatın və ölümün sərhədində belə, başqalarının yaşamaq haqqını müdafiə etmək anlamına gəlir.

Onun təşəbbüsü, xüsusən də səhiyyə sahəsində rəhbər və nüfuzlu bir şəxsin bu cür açıq və cəsarətli addımı, cəmiyyətdə orqan donorluğuna dair maarifləndirmə və təşviqatın güclənməsinə mühüm töhfə verəcək.

Bu davranış hər bir kəs üçün nümunə olmalı, həyatımızın bir mərhələsində bizə lazım olmayan, amma başqasına yaşamaq şansı verə biləcək orqanlarımızın bağışlanmasının necə böyük bir savab və vicdan borcu olduğunu xatırlatmalıdır.