GOES rentgen monitorları avqustun əvvəli Günəşdə 15 güclü alışmanı qeydə alıb – bu, əvvəlki günlə müqayisədə xeyli yüksək göstəricidir. Alışmaların əsas mənbəyi “4167” nömrəli yeni aktiv sahə olub. Bu sahədə toplanmış enerji birdən-birə sərbəst buraxılıb.

Azmedinfo.az "Life" portalına istinadən xəbər verir ki, bu barədə Rusiya Elmlər Akademiyasının Kosmik Tədqiqatlar İnstitutunun Günəş astronomiyası laboratoriyasından bildirilib.

“Digər alışmalar Günəşin diski boyunca nisbətən bərabər şəkildə yayılıb. Hazırda alışma fəallığı sabitləşmə əlamətləri göstərir. Həmçinin, günəş ləkələrinin artımı da dayanmış görünür”, – məlumatda qeyd olunub.

Mütəxəssislər bildirirlər ki, bu aktivlik lokal xarakter daşıyıb və Yerə heç bir təsir göstərməyib.

Günəşdə baş verən alışmalar (fləşlər) Yerin maqnit sahəsinə təsir edərək maqnit qasırğalarına səbəb ola bilər. Bu qasırğalar radio əlaqələrini pozur, peyklərin işini çətinləşdirir və texnoloji sistemlərdə nasazlıqlar yarada bilər. İnsan sağlamlığına təsiri əsasən ürək-damar və sinir sistemi xəstəlikləri olan şəxslərdə baş ağrısı, ürək döyüntüsü, yuxusuzluq və yorğunluq şəklində özünü göstərə bilər. Bəzi insanlar bu günlərdə daha çox stress və gərginlik hiss edə bilirlər.

Qeyd edək ki, kosmosun öyrənilməsində əldə olunan irəliləyişlərə baxmayaraq, günəş aktivliyinin dəqiq proqnozlaşdırılması hələ də mürəkkəb vəzifə olaraq qalır. Hətta süni intellektin tətbiqi belə, bu sahədə tam dəqiqliyə nail olmağa imkan vermir. Ekspertlər ümid edirlər ki, süni intellekt bu istiqamətdə effektiv vasitəyə çevrilə bilər – lakin yalnız bu texnologiya ətrafındakı həddindən artıq “ajotaj” səngidikdən sonra.