Asqırma zamanı gözlərin bağlanması mövzusu uzun illərdir ki, insanlarda maraq doğurur. İnsanların əksəriyyəti əmindir ki, gözləri açıq halda asqırmaq mümkün deyil. Nəhayət, alimlər bu sirri araşdırmağa qərar veriblər.

Azmedinfo.az "Daily Mail"ə istinadən yazır ki, Texas Universitetinin tibb professoru, doktor Deyvid Hyuston bu suala aydınlıq gətirib: bəli, bu mümkündür.

Gözlərin bağlanması sadəcə reflektor hərəkətdir. Yəni bədən bunu düşünmədən yerinə yetirir. Əgər siz bu refleksi idarə edə bilsəniz, deməli, gözləriniz açıq vəziyyətdə də asqıra bilərsiniz. Həkimin sözlərinə görə, bu zaman “gözlərin orbitadan çıxacağı” qorxusu da əsasızdır. Asqırma zamanı yaranan təzyiq hər nə qədər mövcud olsa da, göz almasının yerindən çıxmasına səbəb olacaq qədər güclü deyil. Bu təzyiq maksimum halda göz damarlarına təsir göstərərək qanaxmaya səbəb ola bilər, lakin gözün özünə və ya onu əhatə edən əzələlərə deyil.

"Onu da qeyd etmək lazımdır ki, asqırarkən gözlərin bağlanması əvvəlcədən proqramlaşdırılmış və ya mütləq olan bir proses deyil", – deyə doktor Hyuston vurğulayıb.

Alimlərin sözlərinə görə, asqırmanın səbəbi və növündən asılı olmayaraq insanların əksəriyyəti bu zaman gözlərini bağlayır. Bunun səbəbi tam dəqiq bilinmir, lakin ehtimal edilir ki, orqanizm bununla gözləri mikrobların daxil olmasından qorumağa çalışır.