Nikotinamid və yaşıl çay ekstraktı beyni zərərli zülallardan təmizləyir.

Kaliforniya Universitetinin (İrvayn) alimləri yaşlı neyronların enerjisini bərpa etmək və Altsheymer xəstəliyi ilə əlaqəli toksik zülallardan təmizləmək üçün effektiv təbii maddələr birləşməsi müəyyən ediblər.

Azmedinfo.az xəbər verir ki, bununla bağlı nəticələr "GeroScience" jurnalında dərc olunub.

Tədqiqatda nikotinamid (B3 vitamininin forması) və epiqallokatexin qallat (yaşıl çayda olan güclü antioksidant) istifadə olunub. Cəmi 24 saatlıq müalicədən sonra yaşlı beyin hüceyrələrinin enerji səviyyəsi (xüsusilə GTP – guanozintrifosfat) normaya qayıdıb, metabolik aktivlik artıb, zülal tullantılarının utilizasiyası stimullaşdırılıb. Bu isə amiloid lövhəciklərinin – Altsheymerin əsas göstəricilərindən birinin azalmasına səbəb olub.

Bundan əlavə, oksidləşdirici zədələnmə də azalıb – bu da neyrodegenerasiyanın mühüm amilidir.

Tədqiqatın rəhbəri Qreqori Brüyver qeyd edir ki, GTP hüceyrə enerjisinin vacib, lakin çox vaxt nəzərdən qaçırılan mənbəyidir. Bu maddələrin kombinasiyası kognitiv pozuntuların qarşısını almaq üçün sadə və təhlükəsiz yanaşma təklif edə bilər.

Ancaq alimlər bildirirlər ki, bu maddələrin beyinə optimal çatdırılması yolları hələ araşdırılmalıdır. Məsələn, nikotinamid daxilə qəbul edildikdə qanda qismən parçalanır və təsiri azalır.