Son günlər də havanın temperaturu yüksək olduğu üçün günvurma halları artıb

2025-ci ilin iyul ayı ərzində ölkə üzrə ümumilikdə 63 nəfər günvurma diaqnozu ilə tibb müəssisələrinə müraciət edib.

Azmedinfo.az-a verilən məlumata görə, Bakı şəhərində 53 nəfər (35 nəfər kişi, 18 nəfər qadın) günvurma səbəbilə tibbi yardım istəyib. Onlardan 28 nəfəri xəstəxanaya yerləşdirilib, 21 nəfərə isə yerində ilkin tibbi yardım göstərilib.

Bölgələrdə isə Quba, Ağstafa, Sabirabad, Hacıqabul, Neftçala və Zaqatala rayonlarından ümumilikdə 10 müraciət qeydə alınıb. Bu şəxslərdən 6-sı hospitalizasiya olunub, 4 nəfərə isə hadisə yerində tibbi müdaxilə edilib.

Günvurma və ya istivurma uzun müddət günəş altında qaldıqda bədəndə temperaturu tənzimləyən mexanizmlərin pozulması nəticəsində meydana çıxan kliniki haldır. Yay aylarında hava temperaturunun çox yüksək olduğu günlərdə günvurma hallarının artması gözləniləndir. Lakin hər il baş verən bu tendensiyanı müəyyən qədər azaltmaq, qabaqlayıcı tədbirlər görmək mümkündür.