Yeni Klinikada 86 yaşlı pasiyentə icbari tibbi sığortanın Xidmətlər Zərfi çərçivəsində Hartman və kolovezikal fistulun bərpası əməliyyatları uğurla icra olunub.

Azmedinfo.az xəbər verir ki, tibb müəssisəsinə bağırsaq keçməzliyi, sidik yollarından nəcis gəlməsi, yüksək hərarət və təkrarlayan sidik yolları infeksiyası şikayətləri ilə müraciət edən pasiyentə müvafiq müayinələr nəticəsində kolovezikal fistula diaqnozu qoyulub. Xəstənin vəziyyəti nəzərə alınaraq Hartman əməliyyatı və kolovezikal fistulun bərpası üzrə cərrahi müdaxilənin aparılmasına qərar verilib.

Əməliyyat anestezioloq-reanimatoloq Lalə Əliyeva və komandasının iştirakı ilə, uzman ümumi cərrah Ayxan Abbasov, asistent Dr. Kəmalə Məmmədova və uzman uroloq Turan Məmmədəliyev tərəfindən uğurla həyata keçirilib. Cərrahi müdaxilə nəticəsində bağırsaq keçməzliyi aradan qaldırılıb, eləcə də sidik kisəsi ilə yoğun bağırsaq arasında yaranmış fistul tam şəkildə bərpa edilib.

Məlumat üçün bildirək ki, Hartman əməliyyatı – yoğun bağırsağın (adətən sol tərəfli, xüsusən də sigma hissəsinin) xəstə hissəsinin çıxarılması və bağırsağın iki ucu arasında birləşmənin (anastomozun) aparılmadığı cərrahi prosedurdur. Əməliyyat nəticəsində bağırsağın bir ucu (proksimal hissə) qarın divarına çıxarılaraq kolostoma (süni anus) yaradılır, distal ucu isə bağlanaraq qarın boşluğunda saxlanılır. Kolovezikal fistula isə yoğun bağırsaq (kolon) ilə sidik kisəsi (vezika) arasında anormal keçid (kanal) yaranmasıdır. Bu keçid iki orqan arasında patoloji bir əlaqə yaradır, nəticədə bağırsaq məzmunu (o cümlədən qaz və nəcis) sidik kisəsinə keçə bilər.

Qeyd edək ki, bu tip əməliyyatlar yaşlı pasiyentlər üçün yüksək risk daşısa da, peşəkar tibbi komandanın koordinasiyalı fəaliyyəti nəticəsində əməliyyat uğurla icra olunub.