Pterigium - qanadı xatırladan üçbucaq formalı membranın  konyunktivadan gözün buynuz qişasına qədər tədricən böyüməsi ilə xarakterizə olunan gözün ön seqmentinin xroniki xəstəliyidir. Fibroz toxuma və qan damarlarından ibarət bu patoloji membran burun tərəfindən, yəni gözün daxili bucağından bəbəyin mərkəzinə doğru böyüyür.

Azmedinfo.az xəbər verir ki, adıçəkilən xəstəlik günəş şüalarına, küləyə, tozlu, quru mühitə, allergen və kimyəvi maddələrin təsirinə uzunmüddətli məruzqalma nəticəsində yaranır. Xəstəlik ilkin mərhələdə sadəcə gözdə qızartı, qaşınma, yanma, göz quruluğu ilə özünü göstərsə də, inkişaf etdikcə astiqmatizm, görmə itiliyinin azalması, görmə sahəsinin daralması və məhdudlaşması, diplopiya (ikigörmə) və digər simptomlara səbəb ola bilər.

Pterigiumun diaqnozu oftalmoloq tərəfindən göz müayinəsi, göz almasının ön seqmentinin bio-mikroskopik müayinəsi ilə müəyyənləşdirilir. Pterigiumun mərhələsini müəyyən etmək üçün icbari tibbi sığorta hesabına oftalmoskopiya, vizometriya, perimetriya və refraktometriya kimi müayinələr aparılır. O, həm konservativ, həm də cərrahi yolla müalicə olunur. İcbari tibbi sığortanın Xidmətlər Zərfinə sözügedən xəstəliyin 2 cərrahi müalicəsi daxildir: pterigiumun kəsiklə çıxarılması və pterigiumun transpozisiyası (konyuktival autotransplantasiya).

İcbari tibbi sığorta ilə hər iki əməliyyat tibbi göstəriş və həkim təyinatı əsasında TƏBİB-in tabeliyindəki dövlət tibb müəssisələrində və İcbari Tibbi Sığorta üzrə Dövlət Agentliyi ilə müqaviləsi olan tibb müəssisələrində (özəl və müvafiq dövlət orqanlarının tabeliyindəki) aparılır.