Böyük Britaniyada ölümündən sonra ən çox insana orqan ianəsi ilə həyat verən şəxs müəyyən edilib. Bu, 13 yaşında beyin anevrizması səbəbindən dünyasını dəyişən Jemima Layzelldir. Onun bağışladığı orqanlar səkkiz fərqli insana, o cümlədən beş uşağa yeni həyat bəxş edib.

Azmedinfo.az-ın Orqan Donorluğu və Transplantasiyası üzrə Koordinasiya Mərkəzinin məlumatına istinadən, təqdimatında bir insanın həyatı bitdikdə belə, onun fədakarlığının başqaları üçün yeni başlanğıca necə çevrilə biləcəyi insanlıq və mərhəmət nümunəsi kimi vurğulanır.          

Qəfil faciə və unudulmaz qərar

İngiltərənin Horton şəhərində yaşayan Jemima qəfil beyin anevrizması keçirib. Dörd gün sonra xəstəxanada beyin ölümü qeydə alınıb. Ağır bir zamanda ailəsi çətin, amma fədakar bir addım ataraq onun orqanlarını bağışlamağa razılıq verib.

8 orqan – 8 həyat

Jemimanın ürəyi, nazik bağırsağı və mədəaltı vəzi – üç müxtəlif şəxsə, hər iki böyrəyi – iki nəfərə, qaraciyəri iki hissəyə bölünərək – iki insana, hər iki ağciyəri isə – bir nəfərə köçürülüb.

Beləliklə, səkkiz insan, o cümlədən beş uşaq, onun fədakar ianəsi sayəsində yaşamağa davam edir.

“Onun adı ilə yaşanan hər həyat – onun davamıdır”

Jemimanın valideynləri bildirir: “İndi öyrənmişik ki, Jemima Böyük Britaniyada orqanları səkkiz fərqli insana köçürülən yeganə donordur. Bu, bizi həm qürurlandırır, həm də dərindən təsirləndirir. Hər valideyn övladının xüsusi olmasını arzulayır – Jemimanın bu parlaq irsi onu əbədi olaraq unikal edir. Onun adı ilə yaşanan hər bir həyat, onun davamıdır. Bu düşüncə bizə güc verir.”

Niyə donor olmağa razılıq verməliyik?

Böyük Britaniyanın Transplant Xidməti Jemimanın hekayəsini paylaşaraq insanları ölümündən sonra orqan donorluğuna razılıq verməyə və bu barədə ailələrini əvvəlcədən məlumatlandırmağa çağırır. Qurumun transplantasiya üzrə direktor müavini Entoni Klarkson deyir: “Hər donor dəyərlidir. Amma Jemimanın nümunəsi göstərir ki, bəzən sadəcə bir ‘bəli’ cavabı səkkiz həyat xilas edə bilər. Təəssüf ki, hələ də yüzlərlə insan ailələrin ‘yox’ cavabı səbəbindən transplant gözləyərkən həyatını itirir. Öz istəyinizi əvvəlcədən bildirin, donor olaraq qeydiyyatdan keçin ki, ailəniz tərəddüd etməsin. Özünüzə sual verin: əgər orqan transplantına ehtiyacınız olsaydı, qəbul edərdinizmi? Cavabınız ‘bəli’dirsə, bağışlamağa da hazır olun.”