Spirtli içki mədəaltı vəzi xərçəngi riskini artırır.

Mayami universitetindən olan tədqiqatçılar müntəzəm spirtli içki qəbulunun mədəaltı vəzi xərçəngi riskini yüksəltdiyini müəyyən ediblər.

Azmedinfo.az "Daily Mail"ə istinadən yazır ki, aparılan araşdırma həddindən artıq alkoqol istifadəsinin, qidanın həzmi və qanda şəkərin tənzimlənməsi üçün vacib olan mədəaltı vəzidə ferment istehsalına cavabdeh hüceyrələrə zərər verdiyini sübut edib. Bu zərər iltihab prosesinə səbəb olur və orqanın fəaliyyətinə mənfi təsir göstərir.

Həddindən artıq alkoqol istifadəsi qadınlarda həftədə ən azı 8, kişilərdə isə 15 porsiya spirtli içki qəbul etmək kimi qiymətləndirilir. Alimlər müəyyən ediblər ki, yaranan hüceyrə zədələnmələrinin xərçəngə çevrilməsi üçün hüceyrə böyüməsini tənzimləyən Ras genində mutasiya olmalıdır.

Araşdırma zamanı həmçinin məlum olub ki, iltihabi reaksiyalarda iştirak edən CREB geninin bloklanması, xərçəngöncəsi və xərçəngli hüceyrə dəyişikliklərinin yaranmasının qarşısını ala bilər. CREB, normal mədəaltı vəzi hüceyrələrini anormal, xərçəngöncəsi hüceyrələrə çevirən əsas tənzimləyici rolunu oynayır.

Tədqiqatın həmmüəllifi, cərrah Nipuna Merchant bildirib ki, əldə olunan nəticələr mədəaltı vəzi xərçənginin qarşısının alınması üçün yeni profilaktik metodların işlənib hazırlanmasına zəmin yaradır.